Советот на општина Гевгелија на минатонеделната одржана 44-та редовна седница одобри средства од локалниот буџет кои ќе се наменат за учество на гевгелискиот средношколец Јован Оџаков на 7-та Економска Олимпијада која годинава се одржува во Хонг-Конг.
Оџаков како награден на Републичкaта економска олимпијда се пласираше за учество на Меѓународната олимпијада заедно со уште тројца ученици во државата. За нивно учество на IEO, заедно со професорите ментори, потребни се вкупно 10.800 евра за авионски билети и сместување.
Министерството за образование и наука не може да ги покрие овие трошоци, па деновиве бевме сведоци дека неколку тимови од Македонија кои се пласираа на меѓународни олимпијади од различни области бараат донации за да го обезбедат учеството на Македонија на овие престижни натпревари по знаење.
Советот на општина Гевгелија реагираше на овие јавни повици и на барањето донација упатено од СОУ „Ј.Јосифовски“ до Општина Гевгелија и во петокот одобри 2.000 евра за учество на гевгелискиот ученик при СОУ „Јосиф Јосифовски“ Гевгелија, Јован Оџаков на Олимпијадата во Хонг Конг.
Јован е ученик од втора година сектор економија, право и трговија – профил „економски техничар“ при гевгелиското средно училиште. Овој пласман е највисоко достигнување од школските денови. Како ученик во основно училиште „Владо Кантарџиев“ освојувал награди од областа на географијата, хемијата, англиски јазик, математика, а сега со освоено второ место на Републичката Економска Олимпијада се избори да биде дел од тимот што ќе ја претставува Македонија на престижната Меѓународна Економска Олимпијада 2024.
На 7. Меѓународна економска олимпијада, која ќе се одржи во Хонг Конг од 22 до 31 јули, Македонија ќе ја претстават:
– Миша Веселински – ПСУ „Јахја Кемал“ – Скопје
– Сара Тошевска – Математичко – информатичка гимназија, Скопје.
– Никола Бојчев – Математичко – информатичка гимназија, Скопје.
– Јован Оџаков – СОУ „Јосиф Јосифовски“, Гевгелија.
Ментори:
– Проф. д-р Анета Гацовска-Барандовска Институтот за математика при ПМФ.
– М-р Стево Ѓоргиев од Институтот за математика при ПМФ.
Одобрените средства општина Гевгелија ќе ги уплати од ставката „ДО“ – Градоначалник на сметката на Сојузот на математичари на Македонија.
Им посакуваме среќа на Олимпијците и на нашиот ученик Оџаков!
