Насловот не е замислен проект туку реалност за децата кои престојуваат во детските градинки во Валандово,.
Општина Валандово обезбеди бесплатен престој на дечињата во детските градинки кои работат во состав на ЈОУДГ „Калинка“. Средствата за партиципација кои досега беа на терет на семејствата, ќе ги покрива Општината од локалниот Буџет, со донесената одлука од локалниот Совет.
Од 1 февруари 2023 година, градинките во Општина Валандово се бесплатни за сите дечиња од општината.
Во Јавната општинска установа Детски градинки „Калинка“ во моментов има згрижено вкупно 255 дечиња, од кои : во Валандово – 135, во Пирава – 26, Јосифово – 32 дечиња, Удово – 34 и во с. Брајковци – 28 дечиња.
По најавите дека градинките ќе бидат бесплатни, директорката на ЈОУДГ „Калинка“ Марија Тодорова-Занова за Радио Валандово вели дека со одлуката на Советот на општина Валандово за бесплатен прстој на децата во детските градинки во Валандово очекува бројот на згрижени деца во нивната установа да се зголеми.
– „Со Одлуката бесплатна градинка ќе им се овозможи на децата да ги увидат предностите од посетувањето градинка“- вели Занова.
– „Согласно Одлуката за ослободување од партиципација на деца згрижени во детската градинка од Совет на Општина Валандово, ослободени се жителите на Општина Валандово. Во ЈОУДГ„Калинка“ има згрижено и деца од соседните општини, што значи дека истите не се ослободени од партиципација, а се’ со цел да не се создаде нелојална конкуренција кон детските градинки во тие општини“ вели директорката Занова.
На соседните општини останува да го следат примерот на Валандово за да го олеснат семејниот буџет на младите семејства со ослободување од партиципација за престој на нивните деца во детска градинка.
