По жешкото и огнено лето во кои екипите на ТППЕ Гевгелија бележеа пожари и по 4 – 5 на ден конечно некој се сети дека овие луѓе за својот вонреден ангажман и пожртвуваност на терен заслужуваат посебна награда и благодарност.
Советот на општина Гевгелија на закажаната редовна 51 седница во четвртокот ќе расправа за одвојување парична награда од по 12.000 денари за вработените на ТППЕ Гевгелија, ЈПКД „Комуналец“ и ПШС „Кожуф“ Гевгелија кои учествуваа во гаснењето на пожарите во летниот период 2024 на подрачјето на општина Гевгелија и пошироко.
Се работи за вкупно 79 ангажирани лица на терен од ТППЕ и двете јавни претпријатија. Вкупниот износ за награда на нивниот вонреден ангажман изнесува 948.000 денари со вклучен персонален данок.
Предлогот за доделување парична награда за гевгелиските пожарникари за успешно справување со пожарите во летниот период бил доставен на 4 септември како предлог за дополнување на дневниот ред на 47-та редовна седница на Советот на општина Гевгелија од советничката група на СДСМ. Истиот предлог за одвојување парична награда за пожарникарите кои учествуваа во гаснењето на пожарите во текот на летото поднесе и советникот на Левица Никола Петров, два дена понапред, на 2 септември 2024. И двата предлога, и на Левица, и на СДСМ се однесуваат само за парична награда на пожарникарите во износ од 10.000 денари по лице.
После четири одржани седници и изминати два месеца конечно предлогот за одвојување парична награда за вредната работа на пожарникарите летово стасува на дневен ред на 51-та седница. Но, сега во одлуката има проширена листа за паричен награден прилог наменет и за вработените од „Комуналец“, и гевгелиското Шумско стопанство „Кожуф“ кои со дотур на вода, механизација и одржување дежурни служби на терен придонесоа во акцијата за ставање под контрола и елиминирање на пожарите во Гевгелија и околните општини. Овие лица по список од Јавните претпријатија се административно додадени на предлогот што го поднесоа советничките странски на опозицијата.
Средствата за паричната награда според Предлог-Одлуката треба да бидат обезбедени од буџетот на општина Гевгелија.
За да биде реализирана оваа одлука за награда треба Советот да се изјасни позитивно за истата, па потоа парите да се исплатат на пожарникарите, комуналците, шумските работници.
Само во текот на периодот јули-септември пожарникарите имаа речиси секој ден работа, а некогаш дневно се интервенираше и на 5 пожари во текот на денот.
Се интервенираше на: Пожар кај депонијата во Дојран, пожар во с.Николиќ, гореше шумски појас кај селото Даидово, гореше шумски појас кај село Кованец, гореше вегетацијата во близина на с.Негорци, поворно гореше депонијата кај туристичката населба Карач помеѓу Нов и Стар Дојран, пожар изби и во зелениот појас и нивјето кај с.Моин гевгелиско, единицата на ТППЕ учествуваа во гаснењето на пожарот кај Фурка, кој се префрли низ шумата кон браната Паљурци, два дена гореше и Погана кај Богданци во месноста Блатиште, гореше во Гевгелија кај месноста Касарна, гореше во близина на село Ума, повторно гореше депонијата кај населбата Карач во Дојран, повторно гореше кај с.Кованец, 7 дена гореше шумата на Кожуф планина од с.Кованец кон с.Серменин, гореше кај Богданци и полето кај Стојаково, повторно гореше шумата кај Кованец, екипи на ТППЕ Гевгелија отидоа да помогнат во гаснењето на големиот пожар кај Пепелиште, во Неготино, во ист ден имаше пожар во Гевгелија и Мрзенци, пожар од удар на гром во Богданци, пожар имаше и кај с.Марвинци близу локалитетот Исар, во јуни имаше пожар меѓу селата Негорци и Серменин, во ист ден два пати гореше во атарот на Мрзенци, третиот пожар беше на депонијата кај Конско… Единицата на ТППЕ Гевгелија учествуваше и во акции од трикратното невреме со град во Гевгелија, Мрзенци, Негорци, Моин, во технички интервенции кај тешки сообраќајни акции, во градски акции за гаснење на запалени контејнери со отпад… Се на се’ активно, жешко, огнено и макотрпно работно лето за пожарникарите од ТППЕ Гевгелија.
Ова се наши сеќавања што се’ слушнавме и проследивме на тема пожари кај нас во Гевгелија на нашиот портал GevgelijaNet. Дали е доволно за да советниците одлучат да гласат „ЗА“ одлуката за доделување парична награда на пожарникарите, комуналните и шумските работници? Ќе одлучат членовите на Советот на општина Гевгелија.
Советникот на Левица во гевгелискиот Совет се обрати до нашата редакција и изјави:
- „Јас стојам само зад мојата иницијатива, а тоа е парична награда само за пожарникарите, кои беа цела сезона на пожари, цело лето на терен. Пожарникарите не можат да се стават во ист кош со другите волонтери кои понекогаш биле на пожарите, ангажманот не е ист“ – вели Никола Петров.
Тој не извести дека денеска ја повлекол својата иницијатива за одвојување парична награда и барал да биде доработена со забелешките од Левица.
- „Во материјалите за одлуката ни направиле уфрлување без наше одобрение. Така да, дали ќе биде прифатена од нас во иднина зависи од тоа како ќе ја доработат“ – изјави Петров.
