Женскиот ракомет во Гевгелија по несреќната епизода со ЖРК „Гевгелија“ го продолжува ракометниот од со новоформиран женски тим „Гевгелија Југ“.
Иако нов, со нова управна постава клубот е составен од стариот играчки тим на ЖРК „Гевгелија“ зошто грешките се казнија, лекцијата е научена, ама спортскиот порив продолжува. На тој начин, „Гевгелија Југ“ е наследник на ЖРК „Гевгелија“, кој имаше свои подеми и падови на домашна сцена и доби драконска дисциплинска санкција – исклучување од Ракометната федерација, што значи исфрлување од сите натпреварувања..
Претседател на ЖРК „Југ“ е поранешната репрезентативка на Македонија, Елма Пршеш Попова, која беше дел од поголемите успеси на „црвено-жолтите“ (СП 1997 и ЕП 1998).
- „Новиот клуб е наследник на ЖРК „Гевгелија“, само што овој клуб е со нова постава во однос на Управниот Одбор и стручниот штаб, кој се’ уште го формираме. Го наследуваме играчкиот состав комплетно од стариот клуб, се’ уште не можам да потврдам дали со тие играчи ќе влеземе во наредната сезона, зависи од многу други фактори“ изјави Пршеш Попова за 24ракомет.
Станува збор за клуб кој ќе работи со сите категории, а токму работата со младите ќе биде главниот фокус. ЖРК „Гевгелија Југ“ најавува дека ќе вложи голем труд и ангажман за да ја продолжи традицијата.
- „Покрај сениорската екипа ќе се даде голем фокус и на работата со најмалите категории. ЖРК Гевгелија е клуб со богата историја и еден од најстарите формирани клубови во Македониј. (формиран 1957 година), така што има голем императив да се врати ракометот во градот и да му се даде местото кое го заслужува, секако со голем труд и ангажман на спортските работници и девојчињата кои ќе го носат дресот на овој клуб“, вели Елма Пршеш Попова.
Поради забраната за настап на ЖРК „Гевгелија“ дел од ракометарките се одјавија од овој тим и заминаа да играт во други клубови во државата, РК „Астибо“, РК „Фротирка“ и др. Дали новоформираниот клуб ќе ги привлече назад е прашање на кое веројатно ќе се позанимава новата клубска управа.
Инаку, допрва раководството на Ракометната федерација на Македонија треба да донесе одлука за системот на натпреварување во Женската лига за следната сезона, бидејќи бројката на екипите во сениорска конкуренција сигурно ќе биде поголема од 16. Во следната сезона, покрај ЖРК „Атлетик“ и ЖРК „Јехона“, нов клуб во единственото женско сениорско натпреварување во Македонија би требало да биде ЖРК „Гевгелија Југ“.
