Со црковни литургии, богати почести, празничен ручек и весела вечерна забава, вчера и денес се одбележа празникот Свети Пантелејмон, заштитникот на село Ума Гевгелиско.
Ова е стара традиција на гевгелиското планинско село сместено на 600 мнв на Кожуф планина, востановена уште од предците кои веќе не се меѓу живите, сочувана од тие кои ги преживееја вековните воени и политички трансформации, а негувана и од денешните генерации – да се организира сенародна празнична забава и почести во чест на заштитникот на Ума, Пантелејмон.
Организатор на одбележувањата е црковниот одбор на црквата „Света Богородица Пречесна“ од Ума кои се погрижија и годинава да биде приготвен сенароден празничен ручек во чест на заштитникот на селото, а за бројните гости посетители беше приготвена и Влашка софра од локалните домаќинки, некои староседелки, некои иматели на викенд куќи во Ума. Сите средства од продажбата на домашните изработки, колачи, пити, баници беа донирани за децата со посебни потреби од нашата заедница.
По тој повод во црквата „Свети Кирил и Методиј’ во Гевгелија утрово се одржа празнична утрена богослужба, а потоа и Свечена литургија. Црковниот одбор на црквата “Св. Богородица Пречесна” во село Ума, гевгелиско подготвија празнична литургија, а потоа свечен и благословен ручек за сите посетители.
Пантелејмон („во се’ како лав“) роден е во 275 година од н.е., а маченички умира како непоколеблив христијанин во 305 година од н.е. за време на прогонот на царот Диоклецијан кога биле убиени 20.000 христијани. Бил еден од 14те свети помошници во доцниот Среден век, познат во Западното христијанство, а во Источното христијанство важел за еден од Светите неплатени исцелители кои му помагале на луѓето.
Неделниот топол викенд ден многу граѓани од Гевгелија и роднини на староседелците од Ума го поминаа во природните убавини на ова планинско село опколено со густа шума која дава лад и пријатно воздушно струење, па летото не се ни сеќаваат горештините, а при посетата освен одбележувањето на традициите оддадоа и почит на овој свет лик, исцелител и маченик за Христијанството.
Свети Пантелејмон ги нагости сите посетители на вчерашното одбележување на панаѓурот во село Ума, гевгелиско. На тивок оган во домашно котле, под ладовините на Кожуф манџата е превкусна.
Кој ја посети црквата “Св. Богородица Пречесна” во с.Ума денеска знае, ако не ќе проба догодина.
Пријатен ден со милоста на благодатниот Пантелејмон.
