Нобеловиот комитет објави дека јужноафриканската адвокатка Нави Пилај е годинешниот добитник на Нобеловата награда за мир, се појавија и првите снимки од нејзината реакција.
Нави Пилај – на која Норвешкиот Нобелов комитет ѝ ја додели Нобеловата награда за мир за 2026 година поради нејзиниот долгогодишен придонес кон меѓународното право и гонењето на воени злосторства – не пропушти прилика да се пошегува на сметка на Доналд Трамп, кој во неколку наврати изјавуваше дека очекува Нобелова награда за мир за неговите залагања за мировни преговори за Газа, за Украина, за Иран…
Додека зборуваше во Нирнберг по објавувањето на наградата, Пилај упати духовита забелешка до присутните:
- „Ако аплаудирате малку погласно, можеби и ќе ја споделам оваа награда со Трамп“, рече Пилај, предизвикувајќи смеа кај публиката, која ја поздрави со аплауз.
- „Сè уште не бев слушнала за наградата, дали е вистина дека ја добив? Штотуку ми се јавија и веднаш реков дека сигурно е шега. Како адвокат и судија, морам да потврдам дека информацијата е точна“, се пошегува Пилај.
Таа се осврна и на последниот голем случај на кој работеше – претседавањето со Независната меѓународна истражна комисија на ОН за окупираните палестински територии, која утврди дека Израел извршил геноцид врз Палестинците во Газа.
- „Многумина тогаш ме фалеа што сум имала храброст да ја донесам таа одлука. Тоа ме изненади – на крајот на краиштата, зошто би била потребна храброст за да се каже вистината? Го применувате законот, ги разгледувате сите факти – станува збор за непристрасно носење одлуки“, додаде таа, напоменувајќи дека моментално работи на случајот што Гамбија го покрена против Мјанмар.
- „Сите ме прашуваат: „Кога конечно ќе престанеш?“ Минатиот месец наполнив 85 години. Не можам да престанам поради сите луѓе што ги запознавам“, рече таа.
Овој момент го забележа генералната секретарка на „Амнести интернешнал“, Ањес Каламар, која го објави видеото на социјалната мрежа X, а го пренесе Ал Џезеира.
Забелешката на Пилај доаѓа откако американскиот претседател во повеќе наврати јавно изјави дека смета оти ја заслужува Нобеловата награда за мир. Трамп своите тврдења ги засноваше на дипломатски иницијативи и на улогата што – според негова сопствена проценка – ја одиграл во запирањето на меѓународните конфликти. Како резултат на тоа, прашањето дали американскиот претседател ќе ја добие престижната награда привлече значително внимание во медиумите во последните месеци.
Сепак, Норвешкиот Нобелов комитет одлучи наградата да ѝ ја додели на Нави Пилај, правничка чија кариера е одбележана со борбата против апартхејдот, заштитата на човековите права и работата во меѓународните судови.
