Силниот ветер во текот на вчерашниот ден го направи разбранувано Дојранското езеро и непријатно за уживателите на пливањето. И покрај најавите за очекувани воздушни струења од северозапад со брзина и до 70 километри на час, се најде јунак да плива вчера во разбрануваното езеро и да му се изгуби траг, извесно време од денот.
На интернационалниот број за помош 112 во ЦУК околу 16:30 часот вчера, (недела), побарана е помош за лице коешто пливало кај месноста „Калдрма“ во Дојранско Езеро, но заради лошото време со ветер, бранови и езерски струи истото исчезнало од вид на познаниците кои го следеле од брегот.
После побараната помош излезено е на терен. Лицето е пронајдено живо од страна на полициски службеници од ПС Дојран.
Конкретно, од СВР Струмица известија дека лицето испливало до брегот во близина на грчката граница. Истото од таму е земено од страна на припадниците од МВР и е надвор од животна опасност.
Инаку, полицајците од ПС Дојран со чамец на концесионерот на езерото беа излезени на теренот при силен ветер и бранови и вршеа пребарување на Дојранското Езерото на местото каде што било забележано лицето. ДЗС немаше чамец на Дојранско Езеро.
Треба да се каже дека пливачот имал среќа, кондиција и присебност да продолжи да плива, а брановите и езерските струи да го однесат на брегот од грчката страна на езерото, што е далечина од 7 километри.
Среќен крај на тешкиот избор на време за пливање.
Инаку, вчерашното ветровито време во Дојран беа регистрирани два пожари на отворено и спасувачка акција во водите на езерото со среќен крај.
Во рамки на државата, на Шар Планина, при потрагата, изгубената планинарка е пронајдена утрово без знаци на живот, а имаше и неколку пожари на отворено и 1.643 повици на 112 во последното деноноќие. Бурен ветровит ден.
