Македонската актерка, пејачка и жителка на Стар Дојран Добрила Ивановска Чабриќ гостува на ТВ Прва во Србија и со својот ведар дух објаснува како се одржува позитивно во животот и на свои 97 години.
– „Немам план во денот. Пуштам да ме носат желбите, зошто ако направам план секогаш нешто ќе излезе другачие. И така опуштено живеам“ – вели Добрила за својот слободен уметнички однос и во животот, не само во својата уметничка професија која траеше неколку децении.
На поканата да учествува на утринската програма на Првата ТВ во Србија вели одговорила позитивно и тргнала со автомобил, кој го управува сама.
– „Уживам да возам. Тогаш се осеќам своја“ – вели Добрила.
Сепак, ја забезекна водителката кога и кажа дека некаде пред Јагодина, на пат за Белград ја фатила дремка, запалила цигара иако не пуши (цигарата и’ ја дала снаата за задуша на починатиот внук Влатче), и во обид преку прозорот да ја истресе пепелта со колата удрила во некоја ограда, се затетеравил автомобилот лево десно, додека успеала да воспостави контролира над управувањето со воланот. И, вели „Ништо, продолжив со патувањето“.
Сепак таа вечер останала да преноќи во близина кај свои луѓе и следниот ден да допатува во Белград.
Добрила со насмевка истакнува дека нема проблеми со полицијата која попатно ја застанува, туку дека тие униформирани лица веќе ја препознаваат на оваа релација и и велат: „Добрилче продолжи“.
Својот уметнички живот го одбележа со улогата на Коштана, го позајмила гласот за филмот „И Бог ја создаде кафанската пејачка“, гостувало во Белградското Народно позориште, а со песната била на сцените во Белград, Париз, пеела пред Марија Калас, пред Оназис, Ана Мускури, пред Брижит Бардо, Ален Делон, пред Белмондо и многу други познати лица. Најубаво и било кога настапувала како самостоен уметник во Крит, во Атина, пеела, во Бугарија, Грција, Румунија, Канада и по цела Русија.
Има детали и за животот, и за мајчинството, и за премрежјата со разводот како млада 21 годишна мајка која немала разбирање од сопругот… После 20 и нешто години повторно се омажила со истиот човек, таткото на нејзиниот син. Речиси филмска приказна како холивудските ѕвезди Елизабет Тејлор и Ричард Бартон кои два пати се венчаа и два пати се разведоа.
Погледнето го видео парчето од гостувањето на Добрила на емисијата „Јутор на Првој“, жена која на 97 години шири позитивна енергија.
Добрила стана победник на шоуто „Никад није касно“ во 2018 година на свои 90 години. Од тогаш стана позната на Балканот, ја канат на многу телевизиски гостувања и стана миленик на медиумите во Србија.
Среќно на нашата Доби, нека ја држи гласот за песна и духот на животот уште многу години.
