Европската Унија ќе го преиспита договорот за политичка и економска соработка со Израел поради влошената хуманитарна состојба во Газа, изјави високата претставничка за надворешна политика на ЕУ, Каја Калас, по состанокот на министрите за надворешни работи во Брисел, објави Ројтерс.
Притисокот врз израелската влада се засили откако се појавија поплаки за недостиг од хуманитарна помош во Газа, додека владата на премиерот Нетанјаху започна нова воена офанзива во енклавата.
Калас изјави дека „силно мнозинство“ од министрите поддржале иницијатива за ревизија на договорот за асоцијација со Израел, со акцент на неговото почитување на клаузулата за човекови права.
Според дипломати, 17 од 27 земји-членки ја поддржале иницијативата, која ја предложил холандскиот министер за надворешни работи, Каспар Велдкамп.
Хуманитарна помош во Газа нема ни за леб
Причината за оваа иницијатива е фактот што Израел, од почетокот на март, речиси целосно го блокира доставувањето хуманитарна помош во Појасот Газа, каде што живеат околу 2 милиони Палестинци. Израел своите постапки ги оправдува со тврдењето дека исламистичката група Хамас има корист од тие пратки.
– Ситуацијата во Газа е катастрофална – рече Каја Калас во Брисел.
Иако неодамнешните дозволи за ограничени хуманитарни пратки се поздравени, тие се недоволни и се опишани како „само капка во океанот“.
Видео на „Ал Џезаира“ – Палестинецот Самир е инвалид во количка, плаче и вели „Барам само леб. Немам јадено три дена ништо“. Тој седи во инвалидкста количка на улица каде луѓе панично бараат храна од добротворна кујна, но тој не може ниту да се приближи во толпата која бара храна. Поради блокадите на хуманитарната помош од Израел кон Газа народот таму се соочува со екстремен глад.
Кризата со храна во Газа се продлабочува – суров потсетник за растечката хуманитарна криза.
Обединетите нации предупредија дека стотици илјади жители на Газа се соочуваат со катастрофален глад. Со проширувањето на нападот на Израел, постои загриженост дека ситуацијата во Газа само ќе се влоши.
Главниот странски дописник на ABC News, Иан Панел, известува од Газа.
Додека Газа моли за храна Израел изврши нов напад.
Цивилната заштита на Појасот Газа, која е управувана од Хамас, денеска објави за 19 загинати во израелските воздушни напади врз енклавата, додека Израел упорно се обидува да го уништи исламистичкото движење и да ги спаси преостанатите заложници, киднапирани пред 20 месеци.
