Студиото за модерни танци „SWЕET DANCE“ од Богданци освои три награди на меѓународниот танцов натпревар во Србија – дома се вратија со два златни пехари и еден сребрен за освоени две први места и едно второ место
Првото ЗЛАТО им припадна на девојчињата кои настапуваа во категоријата „Street dance show formation children“ каде настапија вкупно девет групи, но аплаузите и заслужените бодови од жирито им припаднаа на девојчињата од Богданци.
Второто ЗЛАТО го освоија во категоријата B, која се однесуваше на „Hip hop formation juniori“. Овде од вкупно пет натпреварувачки групи најдобар беше настапот на танцовиот состав на „SWЕET DANCE“.
Третата освоена награда беше СРЕБРЕН пехар за освоеното ВТОРО место во категоријата „B Hip hop formation adults“ каде од вкупно три натпреварувачки групи екипата од Богданци беше второпласирана.
Комплетниот состав на „SWЕET DANCE“ се состоеше од 34 девојчиња поделени во три групи секоја со своја изведба, значи вкупно три изведби со три различни кореографии.
Заслугата за целиот успех освен трудот на девојчињата е и на менторката Тина Тренчевска која за GevgelijaNET открива дека како танцово студио постојат од поодамна.
– „Како кореограф многу одамна пред да се формира студиото се натпреварувавме како групи со различни имиња. Подоцна, во март 2015 година се оформивме како Студио за модерни танци „SWЕET DANCE“. Значи овој месец одбележуваме осумгодишнина од нашето постоење под името „SWЕET DANCE“.
Детската желба за дружење и игра, но и сценски настапи кои наликуваат на модерните изведби од спотовите на светските музички ѕвезди привлекоа интерес за членување и следење на програмата на Студиото за модерни танци во Богданци под менторство и кореографија на Тина.
– „Во моментот студиото го посетуваат 60 деца, сите од женски пол. Има и 20 возрасни кои вежбаат „зумба“ и „fitness dance“. Сите членови настапија на традиционален Новогодишен концерт кое студиото го подготвува со своите членови за локалната публика“ – вели Тина.
Таа е горда на својата работа која на сцената ја презентираат вредните членки на Студиото и освојуваат заслужени аплаузи и награди на државни и меѓународни натпревари.
– „Пехарите од Србија не ни’ се први, туку со нив ја дополнуваме витрината со нашите освоени награди. Настапивме во Скопје на Интернационалниот „Dance OFF“, настапивме во Бар, Црна Гора на „Mediteranean Best Dance“, во Ниш, Србија на „International Dance OFF“. Последниот во Лазаравац, Србија на „Internatonal Dance Zone“ … И здравје, има многу други натпревари за кои добиваме покани за учество, но за кои ќе се подготвиме добро и ќе бидеме спремни, на тие ќе учествуваме“ – вели гордо за изминатиот труд и меѓународното учество на Студиото за модерни танци од Богданци, менторкта и кореограф Тина Тренчевска.
За инспирацијата за работи со деца, со млади, со музиката и танцот, Тина нескромно открива дека премногу ја сака музиката:
– „Танцувам од дете, па подоцна ми се појави желба и да работам со деца од мои 14 години.
Наградите на витрините зборат дека Тина тоа задоволително го прави веќе 24 години од својот живот.
– „Што значи, ги сакам децата и сакам да ги учам да танцуваат. Децата се благослов“.
Еве, уште спомени од вредните и наградувани девојчиња од „SWЕET DANCE“ Богданци.
Ова се последните освоени пехари на „SWЕET DANCE“ – сите гордо блескаат за успешниот настап на овие вредни девојчиња.
ЧЕСТИТКИ до вредните девојчиња од „SWEET DANCE“! Продолжете со успесите!
