Јавното претпријатија за државни патишта деновиве преку ангажираниот изведувач „Македонија пат“ работи на асфалтирање на дел од патот Гевгелија-Богданци. Се асфалтира потегот од „Понов мост“ до локално наречената точка „Дуплата кривина“, што е оценка дека е најлошиот дел од патот.
Градежната механизација на „Македонија пат“ од понеделникот е на терен. На оваа патна делница ќе се направи привремена санација на асфалтниот слој пред бензинска пумпа „Шимов“ каде исто така има големи оштетувања на асфалтот, а ќе следува проектна постапка за целиот патен потег.
Освен ова, во општина Богданци веќе неколку месеци траат изведбите за реконструкција и асфалтирање на заобиколницата кај Богданци. Овде тендерскиот избор за главен изведувач го доби „Жикол“ на јавен оглас на нарачателот ЈП за државни патишта.
– „Задоволни сме што нашите укажувања наидоа на прифаќање за градежен зафат на оваа делница- заобиколница која е значајна за сообраќајното растеретување на Богданци., од страна на Јавното претпријатие за државни патишта. Работите започнаа пред нова година. Се изврши раскопување на стариот асфалт, се изведоа нови канализациони линии за одвод на атмосферските води, се поставија пречистувачи на водите од канализационите линии кои што истекуваат во реципиентот, реката Луда Мара, исто така сите раскрсници се осветлени и сообраќајно уредени. Се поставува нов асфалтен слој. Останува за довршување уште 50-на метри до раскрсницата на заобиколницата кон патот за Гевгелија. Овде треба да се постават и канделабри со лед светилки. Очекувам до крајот на мај обиколницата да биде целосно готова“ – изјави за GevgelijaNet Блаже Шапов, градоначалник на општина Богданци.
Инаку, заобиколницата беше пуштена во употреба пролетта 2006 година, на свечена церемонија на која присуствуваше тогашниот премиер Бучковски. Стана сообраќајно решение за растеретување на центарот на Богданци од сообраќај, од тешки теретни возила, од туристички пропатувачи кон Дојран. После 17 години се укажа потреба за нејзина реконструкција заради честите раскопи од водени дотеци кои природно се слеваа кон Луда Мара, а го раскопуваа асфалтот. Новите канали за одвод на атмосферските води треба да бидат решение за ова.
И двата градежни зафати на патната инфраструктура во Богданци се ангажман на ЈПДП, а средствата се од Буџетот на РС Македонија.
