МВР излезе со полициски извештај за синоќешната тешка сообраќајна несреќа кај Дојран, поточно раскрсницата Дојран-Фурка.
На 12.01.2024 околу 20 часот во близина на Дојран, патничко моторно возило „Kрајслер“, излетало во провалија, откако претходно не застанало на дадена наредба за запирање од страна на полициски службеници на раскрсница Смоквица и на влез во Валандово, туку продолжило со движење зголемувајќи ја брзината.
При извршениот увид е констатирано дека во возилото се превезувале 11 лица, мигранти од Сирија, од кои едно лице починало на местото на настанот, едно лице е пренесено во Комплекс клиники „Мајка Тереза“ во Скопје за укажување на лекарска помош, додека на останатите лица им била укажана лекарска помош во Општа болница Гевгелија, по што биле сместени во Прифатно- транзитниот центар Гевгелија за понатамошна постапка.
Според кажаното од мигрантите, возачот на возилото, пред да излета возилото, ја отворил вратата и скокнал, по што се дал во бегство. Увид бил извршен од Јавен обвинител и увидна екипа од ОВР Валандово. Се преземаат мерки за пронаоѓање на возачот и расчистување на случајот.
GevgelijaNet уште синоќа известуваше за случајот, навестувајќи дека во тешката сообраќајна несреќа на раскрсницата Фурка Дојран животот го загубил едно лице, мигрант, тројца беа потешко повредени и пренесени во Општа Болница Гевгелија каде им е укажана специјалистичка медицинска интервенција.
