Краткотрајното но силно новреме со врнежи од дожд кои преминаа во обилни врнежи од град во околината на Гевгелија и Богданци и населените места Мрзенци, Богородица, Негорци со сигурност предизвикало штети кај земјоделските посеви, кои се чувствуваат најпогодени од временските непогоди.
Со цел утврдување на причинетата штета од општина Гевгелија најавуваат потреба граѓаните да достават БАРАЊЕ за утврдување на штетите од вчерашното невреме.
Барањето, образец за пријава на штета од невреме, може да се подигне од просториите на Општинската зграда, од пултот на влезот и истиот е потребно да се пополни, известуваат од локалната самоуправа..
Заедно со Барањето, подносителот треба да достави:
– Имотен лист или договор за закуп за земјиштето кое го обработува,
– документи за сопственост на машини или опрема (доколку се пријават за оштетени од невремето),
– документи за сопственост на жива стока (ако се пријави како угината од невремето),
– или други документи, во зависност од тоа што е оштетено,
– копија од лична карта и
– трансакциска сметка на подносителот на барањето.
По истекот на рокот за поднесување на Барања за претрпена штета од невремето, согласно законските прописи, на терен ќе излезат членовите на Комисијата за процена и утврдување на висината на штетата и на лице место ќе ги констатираат штетите кај сопственикот на земјоделскиот имот, подносителот на барањето.
По утврдувањето на штетите, согласно важечките цени на пазарот и прогнозата за очекуваниот а изгубен род се утврдува вредноста на штетата, а Комисијата согласно Законот предлага финансиско обештетување на граѓаните од претрпената штета како резултат на елементарна природна непогода.
Во Гевгелиското село Негорци имаше и трагично изгубен млад човечки живот од удар на гром, што е елементарна непогода. Како се третираа оваа загуба со Законот, би требало да објаснат стручњаците!
Југот обеле од врнежи од град – с.Мрзенци и с.Богородица гевгелиско најпогодени
