Денес на пладне по истрчани 800 километри од Нова Градишка до Крушево пристигнаа учесниците на ултрамаратонот во чест на Тоше Проески кои беа пречекани од ученици, млади, вработени во институции, угостители, компании и граѓани со рози во рацете.
Тоше со силата на вољта со крепоста на нозете, со македонското знаме со духот на 13-те маратонци кои трчаа на 17-от ултрамаратон се врати во своето родно и сакано Крушево, овде да почива меѓу великаните од Илинден, на Гумење.
Розите, 500ни на број, беа оставани покрај патот при поминувањето на маратонците, а песните на Тоше се слушаа низ целиот град.
Меѓу маратонците се и гевгелиските ултра спортисти Тоше Анчев, Влатко Семенаков и Марјан Туртуров (од Негорци). Тоше Анчев трча по 6 пат маратон за Тоше Проески, Влатко Семенаков втор пат. Се надеваме дека испорачаа почит и незаборав за нашата сакана, а прерано замината музичка ѕвезда и од нас, гевгеличани, од Гевгелија!
Денеска тие заедно се поклонија на вечното почивалиште на нашата и Балканската музичка легенда Тодор Тоше Проески. Загина на овој ден во 06:30 часот на 70 километри пред Загреб, во сообраќајна несреќа кај Нова Градишка. Имаше само 26 години. Македонија, неговата публика и фановите 17 години се сеќаваат на него и не го забораваат, ниту по песните, ниту по добротата, ниту по хуманоста, беше момче со чисто срце и љубов за сите. Негова позната и препознатлива изјава е „Ве сакам сите!“
И ние те сакаме Ангелу и не те забораваме!
