Денот 22 октомври 2015, при породување на пациентката Маја Кадеива од с.Николиќ, општина Дојран во Општа болница Гевгелија, беше кобен за родилката и резултираше со смрт нејзина и на нејзиното бебе.
Девет години семејството на Маја, сопругот и децата очекуваат правосилна пресуда на одговорност за докторите од оперативниот тим за пораќање со царски рез. Обвинети беа двајцата анестезиолози Томе Ванчев и Зоран Јовановски и гинеколозите Венци Чалков и Дончо Москов од Струмица кој беше ангажиран од Општа болница Гевгелија.
По пресуда на Основниот суд во Велес против двајцата анестезиолози кои во меѓувреме починаа, судот ги ослободи од вина Чалков и Москов.
Предметот стаса по жалба до Апелациониот суд кој ја повтори пресудата за починатите анестезиолози и ослободителната пресуда за двајцата доктори гинеколози.
Основното Јавно обвинителство Велес се жалеше на оваа пресуда до Врховниот суд.
Врховниот суд ја прифати жалбата на Основното јавно обвинителство (ОЈО) Велес и на оштетениот Димитрие Кадиев и предметот за одговорноста за смртта на родилката Маја Кадиева и нејзиното бебе, кои пред 9 години починаа во болницата во Гевгелија, го врати на повторно судење, пред Апелација Скопје. Обвинети за кривичното дело „Тешки дела против здравјето на луѓето“ се гинеколозите Венци Чалков и Дончо Москов од Струмица, како и анестезиологот Томче Ванчев од Гевгелија, кој во меѓувреме почина. Почина во текот на истрагата и вториот анестезиолог Зоран Јовановски.
Врховиот суд, постапувајќи по жалбата, констатирал нeколку сериозни повреди на законот:
- „Апелациониот суд Скопје не ги ценел во доволна мера изведените докази од кои произлегува дека обвинетите со превземените дејствија постапиле спротивно на Упатството за медицинско згрижување при царски рез, донесено од Министерството за здравство, објавено во Службен весник на Република Македонија број 47 од 24.03.2015 година. Без постоење на индикација за итност на интервенцијата, без извршени испитувања за моменталната здравствена состојба на пациентката, туку прифаќање на резултати од испитувања направени десетина денови претходно, без навремено комплетирање и состанување на медицинскиот тим кој требало да ја изврши интервенцијата и негово координирано дејствивање при постапувањето согласно Упатството за безбедна хирургија донесено од Светската здравствена организација, а на тој начин однесувајќи се несоодветно, неодговорно и несовесно, телефонски е повикана родилката на 22.10.2015 година заради породување со царски рез иако веројатниот термин за породување на сега покојната родилка Маја Кадиева бил 02.11.2015 година. Во таа прилика, обвинетите иако требале да бидат кохезивни, да делуваат и соработуваат заедно, воопшто не комуницирале и не размениле информации за безбедно одвивање на оперативниот зафат, како што налагаат лекарските правила и прописи, па обвинетите Венци Чалков и Дончо Москов, иако можеле и требале да бараат одложување на интервенцијата, при невозможноста пациентката да биде воведена во анестезија од страна на анестезиологот, тие тоа не го сториле“, се вели во одлуката на Врховен суд.
Судот бара од Апелација Скопје да ги земе предвид овие укажувања и да донесе правилна и законита одлука.
Оштетениот Димитрие Кадиев, сопругот на починатата родилка Маја, е разочаран од текот и долготрајноста на овој предмет и немањето после 9 години се’ уште правосилна судска пресуда.
