Од 1 јули 2024 година на територијата на општина Богданци започна со изградба на нов парк на ветерни електрани „Перун“.
Ветерниот парк Перун ќе се протега на 51,5 хектари на ридестиот терен меѓу селата Селемли и Стојаково, општина Богданци и ќе има пет турбини на ветер, секоја со капацитет од 6 MW, (повеќе од двојно од ВП „Богданци“).
Засега се изградени (подигнати) 4 турбини, следува поставувањето на основата за последната 5-та ветерна турбина.
Висината на еден столб за ветерна турбина изнесува 115 метри, а дијаметарот на елисата со три лопатки која ротира е 170 метри. Површината која ја зафаќаат лопатките изнесува 22,698 метри квадратни.
Паркот„Перун“ има за 25 метри повисока ветерно-турбинска единица од ветерниот парк „Богданци“ инсталиран на Погана и за 50 метри поголем дијаметар на елисата.
Овие џиновски триподи (како во филмот „Војна на световите“ со Том Круз) ќе имаат инсталирана моќност да произведат 72,5 GWh (гига ват часови) годишно производство на електрична енергија.
Проценетиот животен век на производната единица е 25 години, а истите се од марката SG 6.0-170 „Simens Gamesa“.
Инвеститор на овој нов електроенергетски зафат во Богданци е словенечката фирма „ПЕРУН“ преку своја новооснована фирма со седиште во Скопје.
Обемот на работа на „Елнос Груп“ овојпат е поголем во споредба со претходните проекти во областа на енергијата на ветерот во Северна Македонија, бидејќи ни’ е доверена сеопфатната задача за изградба на новата 110 kV трафостаница Перун.
Во рамките на работењето , „Елнос Груп“ се вклучени и во изградба на електроенергетски капацитети кои ќе овозможат поврзување на турбините на ветер со електричната мрежа, вклучително и изградба на приклучен далновод 2×110 kV на четири километри, изградба на среднонапонска мрежа и на крајот, заземјување на турбината на ветер.
Инаку самиот старт на проектот беше успешен, а огромен предизвик беше транспортот на големите по габарит и димензии елиси и конструкциите на столбот, истите да се транспортираат во местото на инвестиционата градба. За Богданци беше најголемиот товар кој поминал на нивната територија, за возачите на транспортните возила беше тест за вештина и умешност.
Ветровитиот југ повторно привлекува инвеститори за изградба на ветерни електрани. Подготвителните работи со регистрација на производно-енергетската инвестиција кај Регулаторната комисија започнаа во 2020 година, а се очекува ветерниот парк во близина на езерото Паљурци кај Богданци да почне со произвоство на електрична енергија во текот на оваа година.
