Со предавање за „Домашната кујна во Македонија“ одбележан Меѓународниот ден на слепите лица во Гевгелија.
Предавч на темата беше Ана Камчева, професорка по готвење од угостителската струка при СОУ „Јосиф Јосифовски“ Гевгелија.
Таа низ своето предавање „прошета“ низ регините во Макеонија и старите кулинaрски традиционални јадења, некои одомаќинети и од времето на Отоманското царство.

Учесници на предавањето беа 20-на членови на Здружението на слепи и сабовидни лица од Гевгелија кои освен експликацијата имаа прилика и да вкусат од традиционалните домашни рецепти од македонската кујна – беа послужени со сутлијаш, сладок десерт подготвен со ориз, вода и млеко, а датира уште од отоманско време на овие простори кај нас.
Настанот се одржа во угостителската сала при средното училиште во Гевгелија, а сутлијашот како изненадување за славениците – по повод Меѓународниот ден на белиот стап, го приготвија учениците од Угостителската струка од истото училиште.


Денеска делегација на Здружението на слепи од Гевгелија беа на средба со заменикот министер за труд и социјала во специјалното училиште „Даре Џамбаз“ во Скопје за да ги застапуваат правата и потребите на слепите лица и нивна видливост во системот и во секојдневниот живот.
На средбата присуствуваа Елена Проданова, претседателка на Здружението на слепи и слабовидни лица од Гевгелија, Лазе Трајков, поранешен претседател и истакнат член на ЗСЛ од Гевгелија, Миле Солаков од Богданци и Татјана Стојановска од Миравци.
Одбележувањата на Меѓународниот ден на слепите лица и „белиот стап“ продолжуваат и на 18 октомври со организирање на манифестацијата „Вешта жена“ каде членовите на ЗСЛ ќе изложуваат свои изработки, јадења, колачи подготвени од нив и ќе се слави трудот и вештината на овие луѓе кои и во светот на темнината знаат да творат.

Мотото на нивните активности е „Видливи сме“ како луѓе, како поединци, како индивидуи, како лица со свои идеи и потреби и не треба да бидат заборавени, ниту маргинализирани од општството.

Минатиот месец Здружението на слепи лица подели 15 „бели стапови“ на свои членови како помагало за движење и ориентација во просторот.
Здружението на слепи лица во Гевгелија брои 40 лица заедно со членовите кои се слабовидни, а опфатот на членството е од општините Гевгелија, Богданци и Дојран. На ниво на држава постојат околу 2.500 слепи и слабовидни лица.



















