На гала вечер организиана од Белата куќа за нејзините новинари-дописници на која требало да се обрати претседателот Трамп, синоќа се случи инцидент со пукање со огнено оружје во салата на хотелот „Хилтон“.
Вооружениот осомничен кој се обидел да влезе во салата во Вашингтон каде што говорел претседателот Доналд Трамп најверојатно целел функционери од администрацијата, изјави вршителот на должност јавен обвинител Тод Бланш.
Бланш во неделата за Ен-би-си изјави дека мажот најверојатно дејствувал сам, откако со воз допатувал од Калифорнија и престојувал во хотелот „Вашингтон Хилтон“, каде што се одржуваше традиционалната вечера на дописниците од Белата куќа, на која Трамп требаше да говори.
Врз основа на досегашната истрага, „веруваме дека осомничениот целел функционери од администрацијата“, рече Бланш, повикувајќи се на одредени пишувања на осомничениот и разговори со луѓе што го познавале. Тој одби директно да каже дали Трамп бил целта, наведувајќи само дека и тој е дел од администрацијата.
Ова е снимка од евакуацијата на претседателот Трамп после слушнатите истрели од огнено оружје.
Осомничениот напаѓач — идентификуван како 31-годишниот Кол Томас Ален од Торенс, Калифорнија — во понеделник ќе биде обвинет за напад врз федерален службеник и употреба на огнено оружје при напад, рече Бланш. Подоцна за Си-би-ес додаде дека се можни и дополнителни обвиненија, зависно од мотивот и доказите собрани во тековната истрага.
Кој е човекот што пукаше Tој дипломитрал на Калифорнискиот институт за технологија во 2017 година и магистрирал на Калифорнискиот државен универзитет во 2025 година. За време на нападот, тој носел пушка, пиштол и неколку ножеви, соопшти полицијата.
Трамп на прес-конференција во Белата куќа изјави дека еден полицаец е погоден од блиску, како што наведе, со „моќен пиштол“, но бил спасен од панцирот што го носел. За време на обраќањето на Трамп лицата на Меланија и функционерите покажуваат загриженост.
На Вечерата на дописниците на Белата куќа, осомничен напаѓач склопил долго оружје во слабо надгледуван простор во близина на влез на терасно ниво, по што отворил оган и се упатил кон балската сала, изјавила волонтерка која била сведок на настанот. Според сведочењето на Хелен Мабус, која работела како волонтерка на настанот, напаѓачот го искористил просторот што не бил под безбедносен надзор, пренесува „Њујорк пост“.
Мабус, која потекнува од Харисбург во Пенсилванија, опишала „импровизирана просторија“ во близина на влезот каде што биле складирани колички со пијалаци и каде, како што навела, во тој момент немало обезбедување. Таа изјавила дека напаѓачот го извадил оружјето од торба или сличен предмет, додавајќи дека тоа било „долго“ и не изгледало како вообичаен пиштол.
Според неа, осомничениот извесно време бил надвор од директниот видокруг на обезбедувањето додека ракувал со оружјето во просторијата, пред одеднаш да се упати кон главниот дел од настанот. „Го склопи и истрча по скалите кон балската сала“, изјавила Мабус.
Потоа, напаѓачот почнал да пука во повеќе правци, додека гостите и персоналот во паника бегале. Таа навела дека слушнала најмалку десет истрели, опишувајќи сцени на хаос во кои луѓето викале и трчале, додека припадници на Тајната служба и вооружен персонал се упатувале кон местото на опасноста.
Мабус додала дека избегала во спротивна насока и не го видела апсењето на осомничениот. Според нејзиното сведочење, целиот инцидент се случил на само неколку чекори од преминот што води кон балската сала, каде што во тој момент биле собрани стотици истакнати гости. објави Скопје1.мк
