Основниот суд во Гевгелија му изрече казна затвор од 18 години на 56-годишниот Васил Режак од дојранското село Сретеново, кој беше прогласен за виновен за кривичното дело „убиство на свиреп начин“. Станува збор за првостепена пресуда, а обвинетиот ќе остане во притвор до нејзината правосилност.
Според обвинението, осомничениот на први ноември 2025, попладнето, во близина на угостителски објект во селото Сретеново, Општина Дојран, со умисла го лишил од живот Никола Тимев, познат помеѓу сограѓаните како Мамли.

Како што е наведено во обвинителниот акт, Тимев и Режак претходно биле пријатели. Критичниот ден заедно седеле на скалите во близина на објектот и пиеле, но во еден момент меѓу нив настанала вербална расправија која прераснала во физичка пресметка.
Обвинителството тврдеше дека Режак најпрво го удирал Тимев со раце и нозе, а потоа и со метална шипка, нанесувајќи му повеќе од десетина скршеници на рацете, нозете и черепот. Од ударите, кои според обвинението траеле речиси половина час, оштетениот не успеал да се одбрани, при што се здобил со тешки телесни повреди и обилно крварење.
По нападот, обвинетиот го оставил Тимев на скалите и побегнал од местото. Повредениот подоцна бил забележан од случајни минувачи, кои повикале итна медицинска помош. Тимев бил пренесен во Медицинскиот центар во Гевгелија, но починал како последица на здобиените повреди.
Пресудата на Основниот суд во Гевгелија е првостепена и странките имаат право на жалба пред надлежниот второстепен суд.

Ова го објави GevgelijaNet за несреќно завршеното пријателство со убиство:
Никола Тимев (53 год.) со прекар Мамли е жртвата од свирепата тепачка во с.Сретеново, дојранско.
Тепачот, иако негов пријател, половина час се заборавил од мавање со метална шипка по главата и целото тело, од што Никола добил повеќе скршеници и обилно крварење, од што починал во болницата во Гевгелија.
Дојранчани се простуваат од својот сограѓанин Никола, кој иако е родум од Богданци долги години живеел во Дојран.
“Почивај во мир МАМЛИ 🙏🏻 Каков и да беше, никој не заслужува таква смрт” – е пораката од дојранчани на социјалните мрежи.
ОЈО Гевгелија денес (04.11.2024 год. н.з.) отвори истрага за кривично дело “убиство” и побара притвор за осомничениот за да не влијае врз сведоците при истрагата.
RIP 🙏🕯



















