Дамата која својот богат, екстравагантен, бурен и меѓународен уметнички живот, од Македонија, до Србија, Франција, Париз, Москва, Русија, Кипар, Бугарија… ја привлече убавината на Дојранското езеро и овде ја напиша својата автобиографија „На пат до 100-та“ Добрила Ивановска Чабриќ, деновите на активна и славна пензионерка ги поминува во Стар Дојран, опкружена со убавата дојранска клима, дојранско сонце и мирисот и свежината која ја носи езерото Дојранско.
Деновиве, под јаворовите сенки, Добрила ги изнесува своите искрени воодушевувања од својот избор да живее во Дојран. Вели: „Дојран е злато. Дојран е мојата терапија, Еве овде за 15 месеци јас ќе наполнам 100 години живот!“
Можеби пресуден фактор имааат долговечните наследни гени на Добрила, но оваа наша, а светска уметница одбра еликсирот на својот живот да го полни со убавото, топло, полно со јод, мирно и тивко поднебје на Дојранското езеро.
Добрила Чабриќ е животворен пример на позитива, ведрина, жена отворена и насмеана кон животот која професорски не’ учи дека ведрината и позитивниот пристап кон животот ја полнат нашата душа со енергија и долговоченост. Вели дека е „имуна на болести“, но е магнет за разговор, а преферира помладо друштво зошто нејзината генерација вели дека се „спори“ за неа и ретко активни како што таа го практикува животот.
Добрила е родена на 1 февруари 1928 година во Бадриќ, тогаш во кралството на СХС, со глума и пеење започнала да се занимава уште од 1946 година дебитирајќи во Македонскиот Народен Театар и се’ уште е активна.
Добитничка е на наградата на Народна Република Македонија, за најдобра женска улога, за улогата на ликот Графира во „Волци и овци“, како и наградата за Радиодифузијата на денон на југословенското радио. На Радио Скопје заедно со Петре Прличко ја воделе емисијата „Весела вечер“.
Во 2012 година, на 85 годишна возраст, Добрила по долгогодишна пауза се враќа на театарската сцена со монодрамата “Методот на Мис Маргарида” од Роберто Атајаде, во режија на Виолета Џолева со која добива специјална награда на Меѓународниот фестивал на монодрама во Битола.
Во 2018 година на 90 години победува на телевизиското музичко шоу “Никад није касно” со најголем број гласови од публиката. На 22 издание на “Еврофест” и беше доделена наградата за севкупно музичко творештво.
Шармантната Добрила има свој посебен ритуал за врвна свежина и топ форма – природен пијалак кој сама го приготвува — домашен чај од смоквин лист, во кој таа буквално се колне за својата долговечност.
СРЕЌНо до 100-ка Доби, па терај и понатаму!
