На вчера одржаната 23-та седница на Советот на општина Гевгелија едногласно е донесено Решение за доделување финансиска помош во вредност од 200.000 денари за настраданите подрачја од земјотресот во Турција и Сирија.
Средствата ќе бидат одвоени од Буџетот на општина Гевгелија и уплатени на сметката на Фонд за солидарност на Црвен Крст на Македонија.
Овој предлог на самата седница како дополнување на дневниот ред го достави претставникот од Левица, иако една недела претходно писмено беше веќе доставен предлог со иста намена, но со вредност од 300.000 денари од советничкта група на СДСМ.
За одлуката да биде одобрен помал хуманитарен паричен износ пресудно беше објаснувањето на градоначалникот на општината Сарамандов, кој ги извести советниците дека Општината веќе помага на Турција со самото тоа што испрати екипа пожарникари кои се’ уште се на терен во настарданите подрачја од земјотресот во Турција.
– „Испратени се со неопходните потреби – храна вода и 120.000 денари за патни трошоци. Затоа солидарната помош да биде 200.000 денари зошто не знаеме колку ќе бидат трошоците за екипата на пожарникарите која што е сега во Турција“ – препорача Сарамандов до советниците.
По ваквото објаснување СДСМ ја повлече својата иницијатива.
На почетокот при утврдувањето на дневниот ред советникот од независката граѓанска листа, Томе Кучуков предложи сите советници и градоначалникот да одвојат едномесечен паушал за помош на населението погодено од земјотресот во Турција и Сирија, по примерот на одлуката на советниците од општина Дојран.
Ваквиот предлог не наиде на широкоградост од страна на советниците, а претседателот на Советот, П.Матх го одби изјаснувањето по истиот бидејќи предлогот не бил доставен во писмена форма до Советот.
Со тоа Советот гласаше за единствениот предлог кој остана за изјаснување со „хуманитарна намена“ за Турција и Сирија. Беше прифатено Предлогот за донесување решение за доделување хуманитарна помош за населението во Турција и Сирија во вредност од 200.000 денари да биде додаден на дневниот ред како 25-та последна точка и за истиот гласаа 16-те присутни членови на Советот на општина Гевгелија, кои останаа до крајот на седницата.
Гевгелија солидарна и хуманитарна! Средствата за оваа намена ќе бидат одвоени од локалниот Буџет на Оштината, што значи средства на граѓаните од општина Гевгелија.
