Празникот на лозарите, винариите и меанџиите денеска се одбележува во духот на традицијата со закројување на лозјата, полевање со минатогодишно вино и богата гозба со цел годината да биде родна, штетниците подалеку од нивите, а грозјето благо, шеќерно и бериќетно за одгледувачите.
Со вакви намери денеска се одбележа Св. Трифун и во Гевгелија. Централна манифестација е закројувањето на лозите во дворот на црквата Света Петка во с.Прдејци. Претходно се одржа водосвет со молитва за благород од локалните свештеници.
На манифестацијата освен локални лозари присуствуваа и гости од градот и Општината.
Со денешното закројување на виновата лоза се означува почетокот од новата реколта на производство на грозје.
Нека биде родот богат и да имаме квалитетно македонско вино, со знакот од гевгелиското поднебје, од југот на Македонија.
На лозарите и на сите граѓани им го честитаме празникот Свети Трифун, со желба за плодна сезона на македонската винова лоза.
Фото: Фејсбук, Градоначалник
