Топлата зима со двоцифрени температури во текот на денот и изобилството од риба и годинава примамија голем број на водни птици да презимуваат на Дојранското езеро.
Нивниот број изнесува над 6.000 и е за една третина поголем од ланската година. Ова се податоците од годинашниот зимски попис, организиран под водство на Македонското еколошко друштво (МЕД).
Од МЕД велат дека Дојранското Езеро годинава го пречекува зимскиот период со засилен живот – бројот на водни птици што тука презимуваат се зголемил за околу 2.000 единки во споредба со минатата година.
Вкупно се регистрирани 6.209 птици, при што доминираат лиските, галебите и кормораните. По нив следат различни видови нуркачи и патки, кои придонесуваат за шаренилото на птичиот свет во ова природно богатство.
Еколозите велат дека Дојранското Езеро во последните пет години бележи умерени флуктуации во бројот и разновидноста на птиците, во споредба со Преспа и Охрид. Најчесто причините се поврзани со колебањата на водното ниво, присуството на ловџии и наглите локални климатски промени.
И годинава се забележани човечки интервенции, особено во северозападниот дел од крајбрежјето, каде земјиштето се претвора во земјоделски површини. Сечењето трска, која е важно засолниште и место за гнездење на бројни видови птици и други животни, може да влијае негативно врз природниот баланс.
Зимскиот попис на водни птици се спроведува на меѓународно ниво секоја година и опфаќа трите најзначајни македонски езера – Дојран, Преспа и Охрид. Од 2010 година, МЕД ја координира оваа активност, а годинашниот попис беше 17-ти по ред во земјава, како дел од глобална програма која веќе шест децении се спроведува во 189 земји и територии.
Годинава се попишани повеќе од 35.300 водни птици од 44 различни видови, на ниво на трите езера. Еколозите предупредуваат дека ваквите пописи се клучни за следење на здравјето на водните екосистеми и за навремено детектирање промени предизвикани од губење на живеалишта, промени во водниот режим, загадување и климатски влијанија.
Фото: П.Иванова
