Со свежо цвеќе на спомениците од жртвите во НОБ од Гевгелија и Гевгелиско, Народните херои и носителите на Партизанска споменица, денеска бројни делегации од јавниот и политичкиот живот во Гевгелија ја одбележана 83 годишнината од храброста на првите борци пртизани од Гевгелија кои се впуштиле во вооружена борба против окупаторот во Втората Светска Војна.
На денешен ден 26. Април 1943 година, во виорот на Втората Светска Војна, излегле во партизани првите борци од Гевгелија и гевгелиско.
Напредните младинци и интелектуалци на тогашната КПЈ, инволвирани во бројни организациони активности против окупаторот, тргнуваат на Кожуф планина и овде ја формираат првата вооружена воена формација.
На 26 април 1943 година во Кожуф планина се нашле првите доброволци-партизани од градот и околијата, а од Гевгелија биле: Ристо Бајалски, Димитар Григоров Зафиров, Димитар Кирилов Брзилов, Петар Христов Балабуров, Михаил Христов Делев, Василка Танова Дуганова, Јанко Милтијадев Инов (Урдинов), Надежда Васил Христова, Александар Мицев Ќаев, Марика Мицева Ќаева, Деко Андонов Ковачев, Васил Христов Карајанов, Христо Василев Поп-Ристов, Илија Танев Миов и Иван Христов Бајков. Сите членови на СКОЈ и младински борци за слобода учесници во илегални акции против окупаторот во градот.
Оваа група од 15 борци пристигнала во три групи, на 26 април, на 30 април и на 3 мај заедно со борци од околните места. На 10 мај на падините на Кожуф планина доаѓа и до официјално формирање на Првиот гевгелиски партизански одред „Сава Михајлов“.
Пред Спомен костурницата на загинатите борци и жртви во текот на ВСВ се одржа и пригодна беседа од страна на организаторите на одбележувањето на денот на храброста – Излегувањето на првите партизани од Гевгелија, Здружението на борците од НОБ и поддржувачите од Гевгелија.
Им благодариме за храброста, пожртвуваноста и изборената слобода!
Вечна им слава на гевгелиските херои, борци и осведочени ослободители!
