Редовна сообраќајна акциска контрола спроведена денеска, ден недела, покажа загрижувачки раст на непочитувањето на сообраќајните прописи на возачите учесници во сообраќајот низ улиците и патиштата во општина Гевгелија и регионот на надлежност на ОВР Гевгелија.
Денеска (28.01.2024) во периодот од 11.00 до 16.00 часот Секторот за сообраќајни работи при Одделот за униформирана полиција-Биро за јавна безбедност и Мобилната единица за безбедност на сообраќајот на патиштата спроведоа акциска контрола на територијата на ОВР Гевгелија за санкционирање на возачи кои не ги почитуваат сообраќајните правила и прописи.
При контролата санкционирани се 45 возачи, од кои 9 за возење без возачка дозвола, 3 моторни возила со изминат рок на важност на сообраќајната дозвола, 7 за непрописно вградени фолии (затемнети стакла), 1 возило за техничка неисправност, 2 возила привремено одземени по чл. 344 од ЗБСП итн.
На сите прекршители изготвени им се соодветни поднесоци.
Статистички гледано на секој еден час биле изрекувани по 9 санкции, или на секои 6,6 минути по еден констатиран прекршок на подрачјето на ОВР Гевгелија.
За споредба, минатата недела во период од 5 часа за време на сообраќајната контрола во Гевгелија беа констатирани само 5 прекршоци за пречекорување на дозволената брзина на движење, а денеска такви прекршоци имаше 9, што е пораст од 80 од сто.
Од МВР велат дека: – „Сообраќајните контроли продолжуваат и во наредните денови. Апелираме до сите учесници во сообраќајот да ги почитуваме сообраќајните правила и прописи и заеднички да придонесеме за побезбедни патишта“.
