Поранешниот репрезентативец Филип Деспотовски е нов тренер на Фк Кожуф!
Деспотовски доаѓа од екипата на ФК „Тетекс“ од Тетово каде беше тренер во сезоната 23/24.
Ваквата рокада на челното место на Кожуф доаѓа по поднесената оставка на досегашниот тренер на гевгелискиот фудбалски клуб, тренерот Сенев.
Оставката беше повод да се свика состанок на Управниот одбор каде беше прифатена оставката и беше одлучено кормилото да го превземе стратегот Деспотовски.
Деспотовски во својата тренерска кариера беше асистен во лигата на Саудиска Арабија во тимовите на „Најран“, „Најерни“ и „Хатта“, како и на и ФК „Емирати“ во Обединетите Арапски држави. Исто така беше и тренер во фудбалската школа на ФК „Вардар“ (У-16, У-19, У21) каде е избран за најдобар младински тренер.
-„На Сенев му се заблагодаруваме за досегашната соработка и му посакуваме многу успеси во иднина, а на Деспотовски му посакуваме добредојде во црвено-белата фамилија и му посакуваме добри резултати и успех во преостанатиот дел од сезоната“ – изјавуваат од управата на ФК „Кожуф“ Гевгелија.
ФК „Кожуф“ настапува во Втората Македонска фудбалска лига и во сезоната 2023/24 има одиграно 17 натпревари, добиено 7 мечеви, 8 загуби, 2 нерешено, реализирано 25 голови (во просек 1,47 гол на секој одигран натпревар). Моментално се наоѓа на 8-мата позиција од табелата на МВФЛ Исток.
Дали оваа статистика го натера Сенев на оставка?
