Новиот освојувач на награден подиум од Гевгелија е 12 годишниот Давид Аврамоски, кој се искачи на високото ВТОРО место во категоријата „кати“ на неодамна одржаното ПРВО Државно Првенство во карате чиј домаќин беше Гевгелија.
Давид е член на Карате клубот „АРМОР“ од Гевгелија и веќе две години тренира со неговиот тренер Ристо Брзанов. Резултатот од соработката е Сребрен медал на Државното првенство во кој настапија 350 каратисти од 48 карате клубови во државата.
Тренерот Брзанов е задоволен од настапот на Давид. Вели дека медалот го заслужил заради уметничката техника на изведбата „кати“ (борба со замислен противник), на прецизно изведените удари, на солидните блокади (на замислениот противник), на концентрацијата, на ставот на целото тело во замислената борба.
– „Високото второ место за Давид го оцени 9-то члена жири комисија на првенството, од кои 5 во ватрешниот дел од подиумот за настап на учесникот, и уште 4 членови на жирито кои го следат настапот на секој учесник во категоријата „кати“ и во категоријата „кумите“ – изјави Брзанов.
Со освоеното ВТОРО место Давид се стекна со право на учество на Балканското првенство во карате како претставник на Македонија, поддржан од Карате Федерацијата на Македонија за настап во конкуренција со најдобрите каратисти од Балканот. Балканското Првентство ќе се одржи пд 31 мај до 2 јуни во Истамбул, Турција, а сите трошоци за претставникот на Македонија од Гевгелија ги покрива КФМ.
– „Пред настапот во Турција со Давид и членовите на КК „Армор“ ќе учествуваме на Меѓународниот карате турнир „Охрид – опен“ што се одржува на 25 мај годинава. Тоа ќе биде спортска подготовка пред Балканскиот настап на Давид, еден вид натпреварувачки тренинг, за да биде и остане во натпреварувачки потенцијал, а секако и спортски предизвик за другите членови на „Армор“ – изјави за GevgelijaNet Брзанов, тренерот на гевгелискиот карате клуб.
Првото Државно првенство во карате за деца одржано во Гевгелија е троен успех за КК „Армор“ од Гевгелија – се покажаа како солидни организатори и домаќини на спортскиот настан, успеаја да освојат подиум со својот истакнат млад каратист и трето да се пласираат на Балканско првенство во карате.
Ова е потврда дека традицијата на карате спортот во Гевгелија успешно продолжува и со новите генерации спортисти и со вредните тренери кои не ги штедат своите знаења за да ги пренесат на новите надежни каратисти од Гевгелија.
Честитки за успехот!
Инаку, Првото Државно првенство во карате за деца се одржа во саботата, 27 април, во спортската сала „26 Април“ во Гевгелија, со организациски влог на КК „Армор“ со поддршка на Карате Федерацијата на Македонија и домаќинстата улога на општина Гевгелија.
Освен Давид, забележително 5-то место освои Делев Мите, член на КК„Армор“ Гевгелија, кој се истакна во категоријата „ката“ – машки, 13 годишна возраст.
Фото: Давид Аврамоски на освоениот подиум со Сребрениот медал и освоената диплома што му ги врачи лично Дејан Чолески, претседател на КФМ (прв од лево), Ристо Мелков, претседател на КК „Армор“(прв од десно) и неговиот тренер Ристо Брзанов.
