По неполни годинаипол од своето основање шаховските ентузијасти од Шаховскиот клуб „7-ми Ноември“ од Гевгелија за денеска амбициозно го закажаа организирањето и одржувањето на Првиот младински шаховски Гранд При турнир 2023 година..
Стартот е во 17:00 часот во просториите на ШК „7-ми Ноември“ Гевгелија. Веќе се пријавени 11 кандидати за учество на турнирот, а организаторот најави дека секој младинец, родени 2008-2012 ќе бидат добредојден и примен за уество на турнирот доколку има желба да се соочи на шаховската табла со своите врсници.
За почетоците и неуморниот од на овој релативно млад клуб на љубители на шахот во Гевгелија разговаравме со претседателот Пепи Танчев.
– „По речиси дводецениско отсуство на организарана шаховска форма во нашиот град и општина како шаховски клуб постоиме од 7 ноември 2021 година . Од тогаш на клубот освен сениорите 25 активни шаховски љубители му се придружија и млади на возраст до 14 години и веќе имаме активни 25 младиннци од 5то до 9-то одделение. За тоа беа заслужни организираните училишни натпревари по шах во основните училишта во Гевгелија и Негорци. Првите шесмина рангирани од трите училишни турнира, значи 18 на број ни’ се придружија во нашите активности како шаховски клуб“ – вели за GevgelijaNet претседателот на гевгелискиот ШК, Пепи Танчев задоволен што на овој древен спорт му се придружуваат и младите.
За иницијативата за „Младинскиот Гранд При турнир 2023“ Танчев истакна:
– „Еден од главните приоритети на нашиот Шаховски клуб од самото отварање, беше грижата и едукација на младите. Па, во тој контекст решивме од овој месец (Март/2023) паралелно со сениорскиот Гранд При 2023 да започнеме со организирање на Младински Гранд При 2023.Турнирите ќе ги организираме секој месец, за да во Декември 2023 го добиеме најдобриот младинец од нашата општина. Право на настап ќе имаат сите од 5 одд. па се до 9 одд.или родени 2008-2012 година“ – истакна Танчев.
Темпото на игра ќе се одвива 10 мин.+ 5 сек по играч, а секој учесник може да се натпреварува без котизација. Шаховскиот клуб за првите 5 ќе обезбеди вредни награди.
Покрај едукацијата на млади шахисти, мотивација за ваков Младински Гран При 2023 е и успешното учество на двајца младинци од Гевгелија на минатогодишното државно првенство во Прилеп од каде Лана Трајкова и Кристијан Кавазов се вратија со освоени трети места и Бронзени медали во женска и машка конкуренција.
– „Гевгелија има шаховска традиција која за жал замре некаде пред две децении. Како младинец шахист ми недостасуваа турнирските шаховски средби, па дури 2021 година заедно со Најдески Благојче и Слободан Дачев станавме иницијатори и основачи на ШК „7-ми Ноември“ Гевгелија. Нашата доброволна организаторска работа гледаме дека е препознаена како позитивна реакција од 50-та шахисти кои станаа наши редовни членови и учесници на турнирите. Минатата година бевме организатори на Меѓународен меморијален турнир во чест на Венци Попов. Наши гевгелиски шахисти учествуваа на регионални и државни натпревари и се враќаа со вредни поени и исвоени места. Сето тоа укажува дека желба за подем има, па нашите усилби да го издигнеме шахот во општината на респектабилно ниво е на вистински пат тоа и да го достигнеме“ – објаснува претседателот на ШК од Гевгелија, Танчев.
Екипа од ШК „7-ми Ноември“ Гевгелија на Купот во Прилеп 2022За да го прошират теренот на своето докажување во полето на шахот ШК од Гевгелија конкурирал во Агенцијата за млади и спорт за добивање статус – Спортски клуб од облста на шахот. Овој месец апликацијата е одобрена и ШК „7-ми Ноември“ официјално влегува на листата Спортски шаховски клуб што ја води АМС. Овој статус им дава можност да земат учество на турнирите кои ги организира Шаховската Федерација на Македонија, но и да учествува на конкурсите на АМС за доделување ваучери за финансирање на спортските активности на клубот.
– „За оваа година конкурсот за доделување ваучери го пропуштивме, но за следната се надеваме со спортските резултати ќе бидеме препознаени и ќе имаме можност да очекуваме ваучери за финансиска поддршка на нашата спортска шаховска програма. Но, затоа пак по втор пат се најдовме во Порограмата за финансиска поддршка на спортските организации и клубови од општина Гевгелија за 2023 година. Корисна е и помошта од општина Гевгелија со доделување на сегашните простории на користење за одржување на нашите спортски активости“ – вели амбициозно за понатамошните планови претседателот Пепи Танчев и за поддршката која ја добиваат шахистите од Општината и компаниите во градот.
„Младинскиот шаховски Гранд При 2023“ почнува во 17:00 часот.
Шахистите на маса пред шаховската табла ќе ги докажуваат своите знаења, а ние на сите им посакуваме брзи мисли, промислени потези и да победат најдобрите.
Со овие најави на претседателот на ШК од Гевгелија од шахистите изгледа дека допрва ќе очекуваме успеси, а можеби и некои мајсторски титулари.
Таблите се поставени. Среќно!
