Вчера и денес СОУ „Јосиф Јосифовски“ од Гевгелија го одбележа јубилејот – 70 години од основањето на првата гимназија во Гевгелија, во далечната 1953 година и воедно патронен празник на средното училиште во Гевгелија.
За таа прилика синоќа беше одржана Свечената академија на која учествуваа учениците со рецитации и музички точки подготвени од наставниците по македонски јазик и литература и музичка уметност, а гостите од КУД „Бојмија“ го изведоа традиционалното македонско оро „Тешкото“.
Во оваа прилика беше одржано и финалето од организираниот квиз „Кој знае знае, кој не ќе научи“.
– „Се гордееме со нашите достигнувања, но во исто време се обидуваме и да пронајдеме начини за уште повеќе мотивација, уште посилна желба и поддршка да се постигне уште повеќе и да се стигне уште „подалеку“. Нека ни е честит патрониот празник на Училиштето , нека не радуваат нови предизвици, успеси и достигнувања“, истакна директорката Танева.
Денеска претпладне учениците, наставниот кадар и гости од локалната заедница положија свежо цвеќе на бистата на патронот, народниот херој од Гевгелија Јосиф Јосифовски, како и на бистата на Ристо Поп-Ристов. Пред присутните беше одржан историски час за патронот Ј.Јосифовски-Свештарот.
Во наредните денови ќе се одржат низа свечености организирани од наставниот кадар и учениците по повод јубилејот кој обврзува на нови генерации и нови знаења.