Гевгеличанката Нина Попова на свои 18 години, во 2022 година, стана репрезентативка на Македонија во ракомет. Веќе една година има репрезентативен стаж со најдобрата младинска ракометна селекциј на Македонија.
Годинава Нина е матурантка и освен матурирањето успева да се најде на списокот на последната селекција на новата селекторка Јулијана Дамческа каде е повикана за член на женска младинска ракометна репрезентација W19, од 30 мај годинава.
Со своите репрезентативки-колешки Нина е веќе на подготовки за настап на Европското ракометно првенство во Романија што ќе се одржи следниот месец од 6 до 16 јули 2023.
Нина игра ракомет од својата 13-та година уште како гимназијалка во СОУ „Јосиф Јосифовски“ Гевгелија со тренер Татјана Бојкова, кога станува член на ЖРК „Гевгелија“.
Нејзината игра на терен станува забележителна кај спортските стручњаци и од 2020 година преминува да игра во дресот на РК „Вардар“ од Скопје.
Желбата да спортува, напредува и победува ја носи во Скопје каде продолжува со своето образование во СОУ „Ѓорги Димитров“ во Скопје, (трета и четврта година средно), каде се сели пред се’ заради клубските обврски кон „Вардар“. Овде го завршува средното образование и матурира. Сега се подготвува за упис на студии.
Пет во едно. Тоа го може и го остварува гевгеличанката НИНА – во една година да матурира, да стане државен младински првак, потоа член на ракометната репрезентација на Македонија, да учествува на Европско ракометно првенство и да се запише на студии.
Пет во едно за брзата и незапирлива на терен, желна да победува и освојува трофеи, спортски и животни, гевгеличанката Нина Попова.
Нина како член на младинскиот тим на РК „Вардар“ настапува веќе три години. Минатиот месец, на 21 мај 2023 на Државното ракометно првенство U19 младински Final4 го подигна победничкиот трофеј. Младинките на РК „Вардар“ станаа ПРВАЦИ на Македонија откако ја освоија младинската титула во финалето на Ф4 турнирот со победа над Ѓорче Петров со 32-29 (14-16).
Нина е родена 2004 година, има 184 см висина, активно игра ракомет веќе шест години, препознаена на теренот како извонреден пикер и моментално е најперспективната млада ракометарка од Македонија. Тукушто зачекори во полнолетството, а веќе следниот месец ќе ја гледаме на ТВ преноси од Европско со дресот на Македонија. Ќе навиваме за НИНА и секако за Македонија.
Среќно Нина, Гевгелија се гордее со тебе!
