Летната туристичка сезона носи многу промет на патници и стока на граничните премини во државата, а најфреквентно е на ГП „Богородица“ кај Гевгелија, но тоа не ја намалува будноста на цариснките работници кои неделава спречија нелегален излез на девизи од нашата земја.
Инспектори од мобилните тимови при Царинската управа, на граничниот премин „Богородица“ кај Гевгелија запленија 98.000 евра од македонски државјанин кој се обидел нелегално да ги изнесе од државата.
Настанот се случил во средата на 26.07.2023 година околу 21 часот на излез од државата. Овде пред царинските службеници се пријавил автобус со турски регистарски ознаки кој сообраќал на редовна линија Гостивар – Истанбул.
При контрола на автобусот и патнците, во лична ташна на еден од патниците царинските инспектори откриле непријавени 4 пакувања обвиткани со црн најлон и селотејп трака во кои се наоѓале вкупно 100.000 евра.
Согласно Законот за девизно работење, на патникот вратени му се 2.000 евра – износ што резидент може да го изнесе без да го пријави, а останатите 98.000 евра се привремено одземени.
Против лицето е поднесена соодветна пријава до надлежниот Основен суд, известуваат од Царинската управа на РС Македонија. .
