Една слатка вест од Љубица, Благица и Валерија кои ја направија тортата „Македонија – чоколаден сон“ и ја освоија ВТОРАТА награда на манифестацијата „Тортијада 2023“ што се одржа во Струмица.
Ова вредно трио е тимот на „Мобилност“ Гевгелија, членки на Задружението на лица со телесен инвалидитет.
Тие како претставнички на „Мобилност“ Гевгелија се натпреваруваа заедно со претставници од осум здруженија на лица со телесен инвалидитет од Македонија . Брашното, јајцата, шеќерот, ванглите беа распослани во работната кујна во објектот на „Вила Парк“ јавно пред сите и пред жирито, а вредните раце на гевгелиските претставнички ја направија картата на Македонија од чоколадо, покриена со боите на Македонското знаме и именувана како „Македонија чоколаден сон“.
Освен изгледот, секако важен е и вкусот, а овој чоколаден сон жирито го наради со ВТОРО место за тимот на „Мобилност“ Гевгелија на 24-та Тортијада 2023.
Првото место го понесе тимот на „Мобилност“ Струмица, а третото „Мобилност“ Прилеп.
Љубица Марковска, Благица Ѓоргиевска и Валерија Пеева со свои раце ја направија „Македонија чоколаден сон“. Со освоеното второ место гевгелиските претставнички на „Мобилност“ само ги потврдуваат своите способности, после освоеното прво место на минатогодишната тортијада со направената торта „Калинка“.
Тимот во состав Љубица, Благица и Валерија оваа година учествуваше и на квиз натпревар во конкуренција на 13 здруженија на лица со инвалидитет и успеаја да се пласираат до полуфинале.
Вредни во знаење, вредни во торти правење … уште многу квалитети имаат членовите на „Мобилност“ и затоа се решени да не заостануваат пред животните предизвици.
Честитки за вредното трио на „Мобилност“ Гевгелија.
