Традицијата на осветување на водите на Дојрансото езеро испочитувана и годинава со Свечена Божествена литургија одржана од парохиски свештеник од црквата „Св. Ѓорги Мченик“ во Нов Дојран.
Бројниот народ, дојранчани и гости, верници и верни на традицијата се собраа кај плажата Калдрма во Нов Дојран каде се одржа свечената церемонија на Водосвет. Потоа беше фрлен Чесниот крст во водите на Дојранското езеро. По него запливаа 20-на момчиња. Најбрз и најреќен од нив беше Давид Стефановски од Скопје, инаку чест посетител на Дојран за време на летото, како имател на викендичка за одмор и рекреација во туристичкото место Дојран.
На среќниот носител на крстот првите честитки за здравје и среќа му ги укажа градоначалникот Анго Ангов.
– „Денешниот празник е еден од најголемите настани за нас – жителите на општина Дојран, затоа што со вера, љубов и надеж во душите доаѓаме покрај осветените води на Дојранското Езеро и ја следиме свечената церемонија на фрлањето на светиот крст.
Посакувам со истата цврста верба да продолжиме да чекориме во секојдневниот живот, да имаме мудрост да ги надминеме животните предизвици, единство да останеме сплотени и во благосостојба која би ја споделувале со другите.Нека ни е за многу години големиот христијански празник Богојавление – Водици!“ – посака за сите присутни на денешното одбележување градоначалникто на Дојран Анго Ангов.
Свечено и многубројно посетено беше и на браната Паљурци каде се одржа Свечена црковна церемонија на водосвет на водите на Паљурци. Овде среќата и честа да го понесе Чесниот крст ја имаше Саше Михајловиќ кој живее во Скопје. Ова момче беше носител на крстот и во 2023 година, па годинава по втор пат му се посреќи.
Нека е честит големиот христијански празник Богојавление – Водици и нека донесе благосостојба, радост, мир и среќа во сечиј дом!
