Без јавна расправа, без учество на граѓаните со свои мислења и реакции по деталните урбанистички планови за Гевгелија каде тие имаа имотни сопственитва, без најава една недела порано според статутарните рокови за работа на општинските тела, денеска општината ги свика советниците на општина Гевгелија да гласаат за два Детални урбанистички плана.
Се работи за ДУП за Блок 11 (дел 11.3), и ДУП а Блок 1.2, Блок 2.1 и Блок 2.2, Општина Гевгелија, за планскиот период 2019-2024.
Двата ДУП-а зафаќаат површина од 35,06 хектари и на истите се предвидени парцели за градба на објекти за комерцијални и деловни намени-големи трговски единици, за производство, дистрибуција и сервиси (во првиот) и објекти за домување (станбени куќи, станбени згради), објекти за комерцијални и деловни намени, објекти за јавни институции, комунална инфраструктура (трафостаници, катна гаража, автобуска станица).
Според законот за просторно и урбанистичко планирање секогаш при носењето на документ од важност за граѓаните, особено документи со трајност од 10 па и повеќе години предвидена е задолжителна јавна расправа на кои граѓаните ќе го кажат своето мислење, а претходно стручњаци кои учествувале во изготвувањето на документот ( во случајот ДУП-от) се произнесуваат за неговата вредност и оправданост на јавна дебата пред граѓаните.
Такво нешто не се случи со овие два Урбанистички плана кои попладнево се разгледуваат на 38-та ВОНРЕДНА седница на Советот на општина Гевгелија свикана за неполни 15 часа од закажаниот почеток на комисиските расправи, а потоа и на Советот.
Што се крие зад ваквото брзање и неинформирање на граѓаните?
Од советничката група на СДСМ уште доцна синоќа реагираа со соопштение во кое наведуваат:
– „Со донесена одлука за избори во државата со ваквото нетранспарентно и нестатутарно работење на Општината раководена од ДПМНЕ се’ мириса на предизборен поткуп, бидејќи општинските челници наместо да ги донесат ДУП-овите по транспарентна постапка со јавна расправа пред граѓаните, цел процес сакаат го завршат итно и неодложно!!!
Предизборното поткусурување со имотот на Општината не смее да се случи зошто ќе биде на штета на граѓаните, а незаконски ќе профитираат новокапиталистите во Гевгелија.
Гевгеличани не го заслужуваат ова.
ОВА Е ПРОПУСТ на Одделението за урбанизам. Ова е самоволие на Општината на чело со градоначалникот кој дозволува вакво распашано управување со ваков клучен сектор во Општината.
Затоа, БАРАМЕ ИТНА ОСТАВКА на Раководителката на Одделението за урбанизам!
А потоа, по депонирање на ОСТАВКАТА ќе разговараме, дискутираме и решаваме САМО во интерес на граѓаните!“ – пишува во реакцијата од СДСМ гевгелија.
Општината Гевгелија која за себе вели дека е меѓу најтранспарентните општини во државата (според некоја анкета спроведена од НВО) денеска нема никакво извествање за ИТНАТА ВОНРЕДНА Седница на Советот на општина Гевгелија. Уште стојат фотографиите од Св.Трифун како последна објава на официјалната ВЕБ страница на општина Гевгелија.
Од другите партии кои партиципираат во локалниот гевгелиски Совет нема реакции по ова прашање.
Нешто е труло во државата Данска (читај Гевгелија и гевгелискиот пашалак) !!!
