Радосен ден од Православниот календар е денот Цветници, познат по тоа што го означува денот кога Исус Христос влегол во Ерусалим, градот во кој по неколку дена ќе биде погубен.
Пречекувајќи го Исус, воодушевениот народ со цвеќе, со палмови гранчиња, но и со својата облека го постилал патот и пеел: „Благословен е оној кој доаѓа во името Господово“. Ваквиот пречек на Исус во Ерусалим бил последица од неговата голема популарност меѓу народот уште повеќе зголемена по воскреснувањето на Лазара, еден ден пред Цветници, на Лазаревата сабота.
Исус во Ерусалим влегол качен на магаре. Толкувачите на Светото Писмо истакнуваат дека кај источните народи магарето било симбол на мирот наспроти коњите што служеле за водење војни. Магарето мирно му служело на човекот како што и Исус му служел на народот.
Овој празник ја одбележува последната недела пред почетокот на Исусовите страдања, смртта и Воскресението.
Во спомен на влегувањето на Исус во Ерусалим, празникот Цветници е востановен уште од најрани христијански времиња, а свечено се одбележува од 3 век.
Цветници е радосен празник, ден кога се слави, се шири среќа и љубов, а во различни земји има различни обичаи. Ова е единствен празник на кој се препорачува да работите, да започнете некој проект, денот да го започнете рано, да наберете цвеќе и да го украсите домот со него.
Црквата „Свети Кирил и Методиј“ уште од синоќа е во празнично украсен амбиент при подготовката за свечен дочек на празникот Цветници. Утрово овде се одржа Свечена архирејска литургија на која чиноначалствуваше Митрополитот Повардарски Агатангел во сослужение на епископ Велички Никола и многубројното свештенство од Гевгелија.
Нека ни е за многу години величествениот празник и триумфалното влегување на нашиот Господ Исус Христос во Ерусалим !
