„Нема одмор додека трае огнената стихија во Македонија!“
Со овие зборови Гевгелиското Архиерејско намесништво во Гевгелија и Хуманитарната организација „Свети Спас“ ја оправдува својата посета на единицата на ТППЕ Гевгелија и донацијата на пакуваа вода и конзервирана храна, неопходна за одржувањето на нивните сили и спремност да се справуваат со огнената стихија која оваа недела беснее на територијата на три општини во надлежност на ТППЕ Гевгелија.
Со благослов на Архиепископ г.г Стефан и митрополитот Повардарски г. Агатангел, посетата е извршена вчера, а донацијата предадена на командирот на ТППЕ Гевгелија, Игор Ризов, како поддршка и помош за „браќата од ТППЕ Гевгелија“ како што велат од ГАН.
При тоа претставниците на Гевгелиското Архиерејско намесништво иразија и благодарност до анонимните поддржувачи од Швајцарија кои донираа две палети вода (168 пакети), на анонимната сестра која донираше триесет пакети вода, но и на сите граѓани кои донирале финансиски средства на жиро сметката на ГАН со кои се набавени 1000 паштети и 500 месни нарезоци кои вчера ги донираа во просториите на ТППЕ Гевгелија.
– „Додека бевме во Гевгелија пожарникарите добија дојава дека огнот се приближил до селото Негорци и имавме прилика да ја видиме нивната спремност за брзо делување, но и загриженоста на нивните лица… Пожарникарите, драги браќа и сестри, се хероите на денешницата затоа што, иако се слаби опремени со заштитна опрема, тие без размислување веднаш штом добијат повик, поаѓаат да се изборат со огнот“ – изјавуваа црковните намесници од Гевгелија кои вчера ја посетија гевгелиската ТППЕ.
Вчерашниот ден беше не само огнен, туку и ризичен за селото Негорци. Во моментот кога била остварена посетата на црковните претставници на ТППЕ Гевгелија тие морале брзо да заминат на интервенција. Почести, благодарности, честења … нема време. Огнот чека да биде запрен!!!
Од Гевгелиското Архиерејско намесништво повторно упатуваат АПЕЛ ЗА ДОНАЦИИ во вода, конзервирана храна, сокови, колачиња… за да им помогнеме на сите кои се вклучени во нерамноправна битка со огнената стихија во Македонија.
Поддршка на оваа хумана мисија даде и фирмата „ЕВН Македонија“ кои ги покрија трошоците за горивото и за трошоците околу патарините.
„Бог да ве благослови и нека ве чува од секое зло!!!“ – порачаа од гевгелиската Црква.
