По 19 години предлагање, конечно Советот на општина Гевгелија ќе расправа по Предлог-Одлука за подигање спомен-обележје – скулптура на Илија Џаџев (1926 – 1991), хуманитарец, виртуоз на обична и хавајска гитара, поет и актер, самостоен амбасадор на нашата земја.
Одлуката ќе се најде пред советниците од гевгелискиот локален самоуправен орган на утрешната 47-ма редовна седница на Советот на општина Гевгелија.
Со одлуката за која треба да се изјаснат советниците спомен обележјето за Џаџев треба да биде излеано во бронза, а местото на неговото поставување ќе биде во централното градско подрачје во близина на Народниот театар во Гевгелија.
Предлогот за вакво оддолжување на општина Гевгелија кон својот истакнат хуманитарец, виртуоз на хавајска гитара, поет и уметник, доаѓа од Домот на културата „Македонија“ од Гевгелија.
Да потсетиме, Илија Џаџев за прв пат се најде во Програмата за одбележување на истакнати настани и личности кои придонеле за афирмација на општина Гевгелија уште во 2005 година и истата беше изгласана од тогашниот општински Совет. Пред крајот на годината средствата од оваа програма, едвам 300.000 денари „ги јадеше“ ребалансот на Буџетот на општината со тоа што тие се прераспоредуваа во други ставки, а Програмата за одбележување на истакнати настани и личности кои придонеле за афирмација на општина Гевгелија остануваше со „Нула“ средства и „Нула“ реализација. Во истата се наоѓаше и ставката за подигање спомен обележје за посветениот доктор Александар Синѓер, првиот послевоен лекар во Гевгелија кој животот и професијата ги посвети на Гевгелија во која го реализира целиот свој работен век и тука почина. Третата ставка во програмата беше реставрација на „Андреевиот конак“, архитектонска урбана знаменитост на Гевгелија. Секоја ставка имаше предвидено по 100.000 денари за реализација, а секоја година ребалансот на буцетот „ги проголтуваше“ сите 300.000 денари за други намени.
И оваа гимнастика се повторууваше и во 2006, 2007, … од страна на сите следни состави на лоален општински Совет, сите Градоначалници, се’ до декември 2023 кога воопшто не беше нотирана ваква Програма во општинскиот Буџет. Значи, ЦЕЛИ 19 години името на Џаџев се нотираше во Програма, цели 19 години се бришеа парите за реализација на спомен-обележјето.
Подоцна се направи Предлог листа на истакнати личности кои би требало да бидат опфатени во една пообемна Програма на општина Гевгелија за одбележување на истакнати настани и личности со спомен-обележје за периодот од 2024- 2029 година. Во истата се најде и името на Илија Џаџев.
Еве го конечно, предлогот за изработка на спомен-обележје за единствениот хавајски уметник од Гевгелија кој одржал над 8.000 хуманитарни концерти насекаде низ светот, без надокнада, но со љубов и посветеност за секого, за обичниот човек, за работниците, за новороденчињата, за пазарџиите, за патниците на железничката станица, за течението на Вардар … ете конечно стаса пред советниците.
Џаџев, извини на полните усти фалба, сиве овие години, а никаков ангажман за одбележување на твојата личност и дело. Ќе се научиме, ама полека, ете учиме да ги цениме вредностите кои не’ одбележуваат! Вечна слава!
