Објавата дека младиот 12 годишен спортист од Стојаково Антонио Каракабаков победил на Балканско првенство во Србија и дека постигнал Државен рекорд, која е иницирана од обавите на семејството за достигнувањето на Антонио, доживеа интерес во спортските кругови, но и реакција на АК „Аеродром“ во чии бои настапува Антонио, како нивен член.
Во нивната РЕАКЦИЈА за објавата – „ВИДЕО: Антонио Каракабаков освои ПРВО место на Балкански шампионат во Србија“, тие го наведуваат следново:
– „На 9-ти февруари 2025 Атлетската федерација на Србија одржа првенство во сала за млади пионери, на кои што надвор од конкуренција учествуваа 2 членови на АК АЕРОДРОМ Скопје (Антонио Каракабаков и Димитар Дичевски).
Антонио Каракабаков настапи на трките на 60 метри и на 800 метри, во кои го освои првото место (надвор од конкуренција). Резултатот на 60 метри за Антонио беше 8.34 секунди, а на 800 метри беше 2:25.79 минути. Двата резултати се лични рекорди за Антонио.
Димитар Дичевски настапи на 60 метри и на 200 метри. Неговите резултати се 8.74 секунди на 60 метри и 29.93 секунди на 200 метри. И двата резултати за Димитар се лични рекорди.
Во текстот кој Вие го имате објавено стои дека станува збор за балкански шампионат, Антонио станал балкански рекордер, како и дека е државен првак. Би ве замолиле да го објавите демантот, со цел на точно информирање на јавноста“ – стои во реакцијата од АК „АЕРОДРОМ“ Скопје.
GevgelijaNet.com ја објавува официјалната реакција на клубот каде тренира и за кој настапува Антонио со цел точно информирање на јавноста. Се извинуваме што неточните информации од семејството доведоа до погрешно рангирање на спортскиот настап на младиот атлетичар од Стојаково. За негово добро, спортска иднина и достигнувања кои што тој ги умее и се очекуваат од него, понатамошната соработка ќе ја остваруваме исклучиво со клубот АК „Аеродром“ Скопје, а не со воодушевените навивачи.
