Васил Јованов доби казна затвор од 12 години поради сообраќајната несреќа во која загина Фросина Кулакова во јануари годинава на булеварот Партизански одреди во Скопје. 21-годишниот Јованов претходно призна вина за делото „тешки дела против безбедноста на луѓето и имотот во сообраќајот“. Смртта на Кулакова ја потресе Македонија и предизвика серија протести поради долгогодишното толерирање на бесните возачи.
– „Обвинетиот Васил Јованов е виновен затоа што без возачка, на црвено, под дејство на алкохол поминал на пешачки и удрил во пешакот Фросина Кулакова, која поминувала на зелено светло, и од кои се здобила со тешки повреди од кои на лице место настапила смрт“, се наведува во пресудата на судијката Снежана Марковска.
Таа наведе дека како олеснителни околности Судот ги ценел признанието на вина и чувството на вина на Јованов, како и свесноста за степенот на кривичното дело што го сторил и последиците, возраста и немањето доволно искуство, поранешниот живот – активен студент и спортист и неговото однесување по сторувањето на делото, додека како отежнувачки околности биле земени интензитетот на дејствијата и прекршување на голем број норми од Законот за сообраќај. Особено како отежнителна околност судот ја цени загубата на еден млад живот, што најмногу ја чувствуваат родителите и семејството.
Освен 12-годишната казна затвор, Васил Јованов треба да ја одлежи и таа од 3 години за трговија со дрога, која судот при одмерување на висината ја вброи во отежителните околности. Судот му одреди и забрана за возење моторно возило од „Б“ категорија во траење од 5 години.
Според таткото на Фросина, таквата казна е награда за Јованов.
Адвокатот на Јованов нагласува дека казната е сепак доста строга и не е во согласност со практиката на казнената политика во земјава.
За делото за кое се товари Јованов е предвидена затворска казна до 20 години. Пресудата не е правосилна и Јованов има право на жалба пред второстепен суд.
Основното јавно обвинителство Скопје поднесе обвинителен предлог и против таткото на Васил, Зоран Јованов, за кривично дело „предизвикување општа опасност“, поради тоа што му дозволувал на својот син Васил Јованов да управува патничко моторно возило, иако не поседувал возачка дозвола.
