По истрчани 900 километри од спомен обележјето во Нова Градишка каде загина Тоше Проески на денешен ден пред 18 години, денес на пладне пристигнаа маратонците кои трчаа за Тоше до неговото родно Крушево. Овде беа пречекани од граѓаните со шпалир од црвени рози, 500 цветови под нозете на маратонците кои со своите стапки го донесоа ТОШЕ дома.
Meѓу 12-те ултрамаратонци кои пристигнаа во Крушево – на Гумење, кај вечното почивалиште на Тоше Проески, беа и гевгелиските атлетичари Влатко Семенаков и Даниел Анчев.
– „Трчаме со срце, како што пееше Тоше – со љубов кон животот и луѓето. Мене ми беше животна желба да трчам на Ултрамаратонот за Тоше и неа ја остварив“ – вели Даниел Анчев, студент по спорт од Гевгелија.
Професорот по спорт, Влатко Семенаков по трет пат го трча Ултрамаратонот за Тоше.
Маратонците, по 18-ти пат – колку што години поминаа од смртта на Тоше, го започнаа својот пат од Нова Градишка во Хрватска, местото каде што тој трагично го загуби животот во сообраќајна несреќа на 16 октомври 2007 година. Нивниот спортски подвиг полн со емоции и сеќавање за Тоше крушевчани го дочекаа со цвеќе во боите на љубовта, љубовта која ја имаше Тоше за сите, и сите негови поклоници за него.
Најстариот учесник, 73-годишниот Ангел Малинов од Загреб, учествуваше по четврти пат.
Најмладиот учесник беше деветгодишниот Даријан Капричевски, кој за првпат трчаше маратон за Тоше.
– „Сакам сите да го слушаме Тоше и да ги следиме неговите пораки“, изјави малиот Даријан.
Во овие изминати 18 години на Ултрамаратонот за ТОШЕ неизоставно учествуваат гевгелиски атлетичари. Прв беше Тодор Анчев со реализирани 10 маратони зад себе, Марјан Туртуров, Влатко Семенаков и годинава за прв пат студентот Даниел Анчев.
На Гумење каде е гробот на Тоше, опкружен со македонските илидненски великани, се собраа почитувачи на делото на Тоше од цела Македонија, но и од балканските и европските земји. Први на полон пред балканскиот музички великан беа 12-те учесници на Ултрамаратонот за ТОШЕ.
Посетителите денеска го посетија и Спомен-домот „Тодор Проески“ на Гумење. Со повеќе од 1.000 експонати поврзани со животот и делото на Тоше, овој музеј е меѓу најпосетуваните во регионот – со повеќе од еден милион посетители досега.
Како се трчаше по трасата од Нова Градишка до Крушево: „За кого? За Тоше!“
Еве како изгледаше атмосферата денеска во Крушево со пристигнувањето на маратонците – ЛИНК.
