Денес, со поетско-музичката програма “Пееме за Гевгелија” започнува шестдневната културна програма со која граѓаните ќе го чествуваат Денот на ослободувањето на Гевгелија од фашистичкиот окупатор, ќе празнуваат 81 година слободарски живот.
Настанот ќе се одржи во салата на СОУ „Јосиф Јосифовски“- Гевгелија, со поетско-музичката вечер „Пееме за Гевгелија“, на која ќе настапат со свои изведби ученици средношколци, потоа членови на театарската група „Дон Кихот“ и Ансамбл „Бојмија“, а почеток е закажан во 19:00 часот.
Културните програми имаат интенција да го одразуваат историското и општественото значење на празникот. Затоа ќе продолжат се’ до 9-ти ноември, а ќе бидат опфатени следниве програмски изведби:
5 Ноември, (среда), со почеток во 19:00 часот, во Ликовната галерија „Амам“, ќе биде отворена Годишната изложба на Друштвото на ликовни уметници- ДЛУГ.
На 6 ноември (четврток), Kонцерт „Музичка разгледница“ во салата на ООМУ „Васо Карајанов“, и театарската претстава „Разбуди се Тина“ во изведба на ансамблот на НУЦК „Трајко Прокопиев“ од Куманово, сала на Народниот театар- Гевгелија,
Централните активности ќе се одржат на 7 ноември (петок). Денот ќе започне со свечено полагање цвеќе на спомен-обележјата во Гевгелија, како чин на почит кон загинатите борци и хероите од НОБ. Потоа, ќе следува училишно дефиле на платото пред Народниот театар во 12:30 часот и откривање на спомен-обележјето на Илија Џаџев во 13:00 часот. Во вечерните часови, со почеток во 19:00 часот, во Народниот театар ќе се одржи свечена седница на Советот на Општина Гевгелија, како централно официјално одбележување на празникот, а веднаш потоа, во 19:30 часот, ќе следи концерт на Градскиот мешан хор „Гортинија“ под диригентство на Илија Атанасов.
Празнувањата ќе завршат со традиционалниот „Фолклорен ѓердан“ кој ќе се одржи во Народниот театар- Гевгелија, во недела на 9 ноември.
