Најмалите фудбалери на Фудбалскиот клуб „Кожуф“ од Гевгелија се на возраст од 8 и 9 години и се натпреваруваат во Детската лига на Македонија од Југоисточниот регион. Овде се натпреваруваат со спортски тимови составени од деца на нивна возраст и тоа од Валандово, Дојран, Струмица, Радовиш, од Фурка и Гевгелија.
До сега одиграле три кола и не знаат за пораз. Имаат постигнато 9 гола, а примиле 6. Имаат остварено победа над „Брера“ Струмица, нерешено со „Победа“ Валандово, а натпреварот со „Хоризонт“ Турново го добиле службено, бидејќи овој тим немал генерациски состав 2017/18 за да се натпреварува во ДЛ.
Нивен тренер и стимулативен фактор за успех на тренерот е Бојана Танова која со нив работи од септември 2025 година, ги потготвува за смела игра, за бестрашност и прецизност пред голот, за успех кој им носи радост на сите од тимот.
– „Како тренер на генерацијата 2017/18, сметам дека нашата улога не е само да ги научиме децата на основите на спортот, туку и да бидеме нивни поддржувачи, водичи и во одредена мера психолози. Работата со најмладите бара трпение, разбирање и многу љубов, затоа што токму во овој период се поставуваат темелите на нивниот карактер“ – изјави за GevgelijaNET тренерот Танова.
Бојана има зад себе 10 годишно искуство за работа со деца, таа е дипломиран професор по спорт и здравје, лиценциран тренер за фудбал со „А“ лиценца, некогашен член на женската фудбалска репрезентација на Македонија, помошник-тренер на Селекцијата на Македонија во женски фудбал 2019-2023. Професионалната определба за спорт ја исполнува како наставник по физичко воспитување во ООУ „Ристо Шулкев“ во Негорци веќе 8ма година по ред. Тренерските амбиции ги остварува преку работа со најмалата група деца од подмладокот на ФК „Кожуф“.
- „Секогаш ги насочувам децата да спортуваат, без разлика дали тоа е фудбал или било кој друг спорт. Најважно е да бидат активни, да имаат здрави навики и да ја почувствуваат радоста од движењето. Спортот не е само игра – тој е начин на живот кој ги учи на дисциплина, почит, тимска работа и одговорност“ – изјави Танова.
Малите фудбалери се загреваат пред натпревар на теренот во с.Прдејци - „Уште од најмала возраст, децата треба да се учат дека имаат обврски во текот на денот, но и дека преку играта и спортот можат да растат и да се развиваат во подобри личности. Преку тренинзите тие учат како да победуваат, но и како достоинствено да прифатат пораз, што е многу важна животна лекција.
За мене, најголемиот успех не е само добриот резултат на теренот, туку насмевката кај децата, нивната желба да дојдат на тренинг и пријателствата што ги градат. Токму преку спортот тие создаваат врски кои можат да траат цел живот“ – вели тренерот Бојана Танова.
Најмалите фудбалери на ФК „Кожуф“ во претстојниот период ги очекува да одиграат уште 6 кола. Првиот следен предизвик е средбата и дуелот со детскиот тим на ФК „Дојранско езеро“ од Дојран. Натпреварот ќе се одигра во недела 5 април на игралиштето од ООУ „Владо Кантарџиев“ во Гевгелија, со почеток во 10:00 часот. Ќе се одиграат две утакмици, помеѓу генерација 2017 и помеѓу генерацијата 2018.
ВЕ ОЧЕКУВААТ за НАВИВАЊЕ!
Инаку, ФК „Кожуф“ Гевгелија како еден од најстарите Фудбалски клубови во Македонија (втор по старост) води грижа за создавање на свој фудбалски подмладок кој ќе ги замени сениорите во Македонската лига, тренирајќи со деца и млади во категориите:
– Детска лига
– Помлади пионери
– Пионери
– Кадети и
– Младинци.
Сите категории на подмладокот од ФК „Кожуф“ се активни и настапуваат на натпревари од своите возрасни категории. Најмалите од детската лига се ученици од II и III-то одделение и, иако тренираат само половина година веќе се сигурни на теренот, постигнуваат и голови, нижат успеси и се радуваат. Тоа е спортот за децата – ИГРА за РАДОСТ!
Им посакуваме успех и радост и понатаму!
П.С.
Немојте да заборавите да отидете да навивате за нив во недела!
