Денешниот попладневен дожд за помалку од 30-на минути во Гевгелија „истури“ дождовна маса од 16 литри на 1 метар квадратен.
Тоа беше обилен налет на атмосферска вода која сегашната атмосферска канализациона мрежа во градот која е во реконструкција не можеше во целост да ја прими.
Вака изгледаше на кружниот тек на влезот во градот на Булевар „Гевгелија“ каде се вкрстува со ул.„7 Ноември“, непосредно после дождот.
Дождот почна нешто после 17 часот, а дотогаш цел ден помина во спарнина и едвам три капки во текот на денот додека времето се накани да заврне, (наврнати беа само 0,3 л/м2 до 17 часот, според податоците н аУХМР).
Најавениот циклон од Џенова во текот на денот веќе беше пристигнал во Македонија во западните делови од државата. На југит најпрво заврна, според јавувања на читатели, во Прдејци и Негорци со кратки епизоди на врнежи од град кои поради интензивниот дожд ја изгубија својата ударна сила и не беа предизвикани штети по посевите.
Дождот беше посакуван од страна на пчеларите кои потенцираа: “Ако нема дожд да ги живне ливадите и нивните цветови ќе нема мед. Раниот мраз ги уништи цветовите на багремите, не се нагостија пчелите, останува да очекуваме ливадска испаша”.
Ете, заврна дожд, ќе живнат ливадите, ќе има гозба за пчелите.
До следниот дожд пожелно е да се интензивираат изведбените работи за атмосферската канализациона мрежа низ градот Гевгелија, заради превенција од поплави, за што е и намената на проектот.
