Мирен протест под пораката „Стоп за фемицидот“ е најавен за утре, петок, 6 ноември, во 19 часот во Градскиот парк во Богданци. Собирот се организира во чест на 17 годишната Билјана, со барања за одговорност, заштита на жените и итна акција од институциите.
- „Нејзиниот глас е замолчен, но нашиот мора да биде погласен од кога било“, се наведува во повикот објавен на социјалните мрежи.
Иницијаторите порачуваат дека фемицидот мора да се спречи пред да се случи и дека институциите треба навреме да реагираат за да се заштитат животите на жените.
- „Секој изгубен живот е системски неуспех, секоја премолчена жртва е заеднички пораз. Не смееме да дозволиме повеќе ниту една жена да живее во страв, ниту едно семејство да биде завиено во црно“, стои во повикот.
Се нагласува дека протестот нема партиски карактер и дека е отворен за сите граѓани кои сакаат да побараат правда и заштита од насилство.
- „Излези и ти, за Билјана, за сите нас, за иднината на нашите деца“, повикуваат иницијаторите, со пораките „Правда за Билјана“ и „Ниту една повеќе“.
Организаторите повикуваат на солидарност со семејството на Билјана и со сите жртви на родово базирано насилство, нагласувајќи дека молкот и рамнодушноста не смеат да бидат одговор на ваквите трагедии.
