Љуба Аџиниколова од Гевгелија почина денеска во 81-та година од животот.
Родена е 1943 година и на свои 24 години се вработува како служителка во Основното училиште „Крсте Мисирков“ во Гевгелија. Овде го помина целиот свој работен век, вредна и почитувана.
Беше позната по својата насмевка која кога ќе ја огрееше на своето лице низ муабет стануваше заразна, пренеслива, позитивна во секое друштво.
Беше член на ансамблот “Распеани Гевгеличани“ под ракоодство на Александар Попов, инаку нејзин брат, музичар, музички педагог, наставник во истото училиште и основач на ансамблот „Распеани гевгеличани“.
Љуба учествуваше во првиот состав на ансамблот кој беше најброен и со пејачи, и со членови на оркестрот и со овој состав учествуваше во снимањето на посебна емисија на Македонската Телевизија за „Распеаните гевгеличани“ во 1983 година.
Љуба не е професор, не е доктор, не е уметник, туку жена од нашата Гевгелија која целиот работен живот го поминала со учениците, песните со „Распеаните гевгеличани“ со насмевка и добар збор, затоа и го носеше најубавото име Љуба, како љубов кон се’ што е убаво и вредно во животот, затоа и го заслужи нашето внимание за последен поздрав на страниците на нашиот портал.
Роднините и пријателите ќе можат да и’ упатат последен поздрав утре во 11 часот во Градската капела во Гевгелија, а погребот е закажан во 12 часот на Градските гробишта во Гевгелија.
Нека најде мир и Вечен спокој!
