Самоиницијативниот доброволен еко-активист, Самир Патрон од Дојран, кој со другарот Бранко Караколев заедно го исчистија каналот кај Топлец од системот „За спас на Дојранското езеро“ денеска започна и реализира нова еколошка акција.
Самир од изутрина се упати на локацијата од историскиот споменик, Саат кулата во Стар Дојран каде ја разгледа локацијата и заклучи дека и’ треба средување. Тој најпрво го исчисти отпадот низ околниот простор, кантите за ѓубре кои беа полни, а потоа се зафати со косење на израснатата трева која пораснала до висина на клупите за одмор на околниот простор од паркот кај Саат кулата.
Искосената трева е прибрана од просторот во кеси за отпад и отстранети од локацијата на соодветно место – контејнер за отпад.
Ова е 27-миот акцијашки ден на хероите од Дојран и трета по ред еколошка акција што ја изведуваат другарите Самир Патрон и Бранко Караколев за Дојран.
Најпрво за 24 дена го исчистија каналот кој носи вода од ХС кај Ѓавото до месноста Топлец од каде се влеваат водите за полнење на Дојранското езеро. Следниот ден, 25-от, го собраа искосениот отпад од трева и растителен отпад во тракторски приколки и го депонираа во контејнер за отпад. Следниот 26-ти ден, другарот на Самир, Бранко Караколев го собра урбаниот отпад (шишиња, конзерви, линеки, хартија) од паркот кај каналскиот систем кај Топлец.
Денеска на 27-миот ден Самир не мирува, го исчисти просторот кај Саат кулата во Стар Дојран.
Саат кулата е историски споменик, изграден во 1372 година како поклон за некогашниот град Дојран од страна на Евренос-бег. Била урната во виорот на Првата светска војна 1913 година, а реставрирана е во 2023 година.
Денеска е туристичка атракција на мапата за посета на знаменитости во Стар Дојран.
Ете, без туристички водич, без туристички прирачник, Самир си ја знае вредноста на својот град, на општина Дојран, на нејзината историска и природна вредност и самоиницијативно, повторно се втурна во нова акција од љубов за Дојран.
Ова е пример дека младите генерации не се мрзливи за работа, туку се пример дека кога гледаат дека работите стојат во место, млади се, храбри, издржливи и не се штедат да придонесат нешто за својата заедница.
А, заедницата не мора само да гледа и да вика „Браво“. Треба да се наградат со вработување овие млади еко-ентузијасти, доброволци, оти се пример за посветеност како се сака Дојран, како се сака своето парче земја!
Самир и Бранко се невработени. Самир и Бранко не се плашат од работа, дури и таа која што надлежните заборавиле да ја завршат. Самир и Бранко работат 27 дена нон-стоп за разубавување на Дојран без да побараат помош од никого. Повикаа да им се придружат граѓаните, дојранчани, не им се придружи никој. Ваквата непоколебливост за работа не треба да се поттури во заборав, туку треба да се награди со ВРАБОТУВАЊЕ!
Хероите на Дојран, Бранко и Самир го исчистија каналот од системот за полнење на Дојранското езеро
