Никола Пеев од Стојаково е долгогодишен репрезент на ЗЛТИ „Мобилност“ Гевгелија на спортските настани од атлетиката, на натпревар во табла и редовно освојува подиуми, награди, медали меѓу првите три места од најдобрите на натпреварите.
Последното негово достигнување е освојувањето на ТРЕТО место на XV Републични натпревар во табла што го организира „Мобилност Македонија“ под домаќинската палка на Здружението на лица со телесен инвалидитет на Тетово „Мобилност“ за Тетово и Гостивар.

Натпреварот се одржа во тетовска Брвеница. На натпреварот, кој е традиционален, учествуваа 14 натпреварувачи од седум здруженија, членови на Националниот сојуз „Мобилност Македонија”.
Титулата „најдобар во табла“ ја освои Горан Војноски од Кочани, кој во финалниот дуел беше подобар од Ванчо Каранфилов од Скопје. Во борбата за третото место, Никола Пеев од Гевгелија ја совлада Љубица Боевска од Струмица.

Победникот Војноски доби пехар и награди од спонзорите. За освоено второ место, Каранфилов беше награден со нова табла, додека за третото место, според воспоставената традиција, Пеев доби еден литар ракија.
Претседателот на Здружението „Мобилност” Тетово и Гостивар, Велибор Јаќимовски, истакна дека ова здружение е редовен домаќин на настанот кој годинава одбележува 15 години постоење. Тој изрази жалење за намалениот одзив.
Натпреварот заврши со заедничко дружење и забава на сите учесници, со што се одржува традицијата на социјализација и меѓусебна поддршка, воспоставена од „Мобилност Македонија”.





















