Томче има 10 години и тоа што изненадува кај него е спортскиот стремеж, спортските победи, освоените подиуми.
Внимавајте – САМО за еден месец освои четири подиуми од кои три Победнички и едно ТРЕТО место. Четири подиуми во низа, само за 30 дена. Секој викенд трка, секој викенд победа и една бронза. Две трки се во Грција, една во Кичево и една во Скопје, сите трки се во меѓународна конкуренција и од сите нив Томче се врати со три победнички пехари и четири освоени медали.
Да одиме по ред:
– ПРВО МЕСТО на трката во Гуменица, Грција, „детска трка“, освои пехар и медал, (5 септември 2026);
– ПРВО МЕСТО на трка во Катерини Грција, „детска трка“, освои пехар и медал, (13 септември 2026);
– ПРВО МЕСТО на трка во Кичево, 20 септември – освои пехар и медал;
– ТРЕТО место на трка во Скопје, општина Илинден, 27 септември 2026, освои медал.
Можеме да нагласиме дека на трката во Илинден, Скопје, Томче настапи најпрво на траса од 5 километри заедно со близу 200 сениори, во машка конкуренција и го освои високото 56 место, со резултат 22:37 минути, а има само 10 години, наспроти атлетските „тешкаши“ и докажани ветерани на атлетските патеки. Потоа, требаше да ја трча детската трка од 400 метри. Заморот од трката на 5 км си го направи своето, тој да биде секунда зад носителот на првото место. Така да, да не одбереше учество на сениорската трка од 5 км, сигурно дека во конкуренција со своите врсници ќе беше ПРВ.
Но, Томче ужива да трча. Малку му е еден предизвик на ден, една детска трка. Тој сака да им парира и на батковците, и на чичковците, и секогаш му успева барем 100-на на трката да претрка и да ги остави зад себе. На последната трка во Илинден, на 5 км „Ilinden Life Run“ од 181 учесник зад себе остави 125 натпреварувачи повозрасни од него.
Томче Петков е член на АМ „7 Ноември“ Гевгелија. Веќе три години тренира во „Школата за атлетика“ под раководство на професорите по спорт Влатко Семенанаков и Тодор Анчев. Ученик е во V-то одделение во ООУ „Кирил и Методиј“ во Стојаково.
Овој сезонски успех е потврда дека ужива во спортот не само како вон школска активност, но и со спортски порив да победи и да освојува подиуми.
Со победнички резултат на тркачките стази Томче за прв пат се претстави на детската трка на 7-мо Ноемвриските трки „November RUN“ во Гевгелија, по повод денот на ослободувањето на Гевгелија. Минатата година на јубилејното 5. издание на уличната улична трка „November Run Gevgelija 2025“, младиот атлетичар Томче Петков (роден 2016 година) оствари голем успех освојувајќи го првото место во својата категорија, со време од 3 min и 40 секунди.
Победничкиот пехар и медал на детската трка во 2024 година на „November RUN“ беа повторно во рацете на Томче, во негова конкуренција, родени 2015-2016 година, со победничко време од 3 минути и 55 секунди.
Подемот на Томче започнува по 2023 година: На изданието на „Новембер Ран“ во 2023 година, тогаш како 7 годишник, тој постигна извонреден резултат завршувајќи веднаш зад значително постариот победник (12 години) на детската трка.
Томче продолжува да настапува за матичниот клуб АК „7 Ноември“ Гевгелија, со кој редовно освојува медали и подиуми на трки низ Македонија, Србија и Грција.
Секоја чест за малиот рекордер со брзи нозе и големо срце.
Негов идол е Дарио Ивановски, Олимпијскиот претставник на Македонија на ЛОИ во Париз 2024 година, маратонец и стипендист на МОК, кој редовно настапува на уличните трки во Гевгелија. Па, ако може Карлос Алкарас да го има за идол Новак Ѓоковиќ и да успее да се натпреварува со него и да го победи на теренот, не е чудо и ова дете од југот да стане наш иден Олимпиец. Секако, го очекува многу учење, тренинзи, настапи и упорност.
Напред Томче, трчај, победувај и стреми се за нови успеси!
