Астрагалус е билка која расте во поднебјето а општина Богданци, поради што на ден Ѓурѓовден, празникот на природата и животот, учениците со пригодни активности го одбележаа значењето на оваа билка.
Како ретка билка таа го карактеризира подрачјето на општина Богданци и дел од Дојран како „Значајни растителни подрачја“ (ЗРП). Тие по дефиниција претставуваат најзначајни места во светот за диверзитетот на диворастечките растенија. Заради одржувањето на светскиот биодиверзитет ова растение од југот преку националните системи за заштита на природата, е под посебен режим на евиденција, мониторинг и ефикасна заштита.
ЗРП „Богданци“ вклучува 8 вида заштитени растенија од кои Астрагалус е на прво место по важност со категоризација „А(i)“ .
Пред некоја година овде во Богданци беше насликан 12 метарски мурал за одбележување на важноста на оваа растение кое е се’ поретко, за подигнување на свеста истото да се чува и опстои, како специфичен дел од флората на Богданци.
Децата и учениците од Богданци, вчера имаа пригодни активности, со цртање, квиз и изложбени поставки на своите дела, се во духот на знаењето за Богданци, Астрагалусот и природата.
Првите активности започнаа со искачување по патеката на Астрагалусот, кој е со должина од вкупно 4 км во два правци.
Потоа беше организирана ликовна работилница на која учествуваа дечиња од детската градинка „Коста Поп Ристов Делчев“ од Богданци. За учениците од основните и средното училиште од општина Богданци беа организирани Квизови на знаење за диви растенија.
Денот посветен на природна реткост и убавина на Богданци – Astragalus physocalyx (меурест козинец) се финализираше со концерт на кој настапи Дани Димитровска со својот бенд.
Настанот се реализира во рамките на проектот „Градење на локалните капацитети за управување со Значајното растително подрачје Богданци“ кој го спроведува Здружението за развој, едукација и еколошка етика – „ПОЛИМАТ 13“, финансиски поддржан од Critical Ecosystem Partnership Fund (CEPF).
Кон спроведување на настанот се придружи и Општина Богданци која го поддржа „ПОЛИМАТ 13“ во прославата на Денот на Астрагалусот.
– „Astragalus physocalyx или Меурест козинец според критериум А има статус Ex/En (истребен/загрозен) односно глобално засегнат вид. Се наоѓа на листата на Строго заштитени диви видови во Македонија, на Глобалната црвена листа на Меѓународната унија за заштита на природата (IUCN Red list of Threatened Species), како и на првата Црвена листа на загрозени видови во С. Македонија“ – појасни Надица. Маџирова од Здружението „ПОЛИМАТ 13“ од Богданци кои се организатори на овој настан и носители на проектот „Градење на локалните капацитети за управување со Значајното растително подрачје Богданци“.
