Со ниту една пријава за нарушување на јавниот ред и мир во Гевгелија и на подрачјето на надлежност на ОВР Гевгелија (општините Гевгелија, Богданци и Дојран) за време на Новогодишната ноќ, се констатира дека југот од Македонија имаше мирен дочек на Новата 2023 година.
Овој податок го споделија со нас за GevgelijaNET дежурните служби од Полициска станица Гевгелија.
Мирна Новогодишна ноќ во повеќе места во државата констатираше денеска и министерот за внатрешни работи Оливер Спасовски на состанокот со раководителите на секторите при МВР.
– „Што се однесува за изминатата вечер, на територија на целата држава Новогодишната ноќ помина мирно, без поголеми нарушувања на јавниот ред и мир“, истакна Спасовски.
Тој им се заблагодари на сите граѓани кои што празнуваа и прославуваа одговорно така како што беше апелирано од МВР, со што придонесоа Новогодишната ноќ да ни’ помине мирно и безбедно така како што сите посакувавме.
Воедно, министерот Спасовски информираше дека во споредба со минатата година, има намалување за 30% на пријавени настани од областа на нарушувањето на јавниот ред и мир за време на најлудата ноќ во годината. На преминот од 2022 во 2023 година најголемиот број пријавени настани се на подрчајето на СВР Скопје, потоа СВР Охрид, останатите сектори имаат многу малку пријави.
Од МВР потенцираат дека за време на Новогодишната ноќ СВР Велес и ОВР Гевгелија немаат ниту една пријава за нарушување на јавниот ред и мир, па се Новогодишни рекордери по одговорно однесување на граѓаните и за време на прослави.
